ރަށެއްގައި ހިންގާ އެއްވެސް މަޝްރޫއެއް ހުއްޓާލުމަށްވެސް އަދި މަޑު ޖައްސާލުމަށްވެސް އަންގަވާފައި ނުވާނެ ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.

އިންތިހާބީ ރައީސް މިއަދު ކުރެއްވި ޓްވީޓެއްގައި ވިދާޅުވީ އެއްވެސް ރަށެއްގައި ހިނގާ އެއްވެސް މަޝްރޫއެއް ހުއްޓާލަން، ނޫނީ މަޑުޖައްސާލަން ނުދަންނަވާ ކަމަށާއި އެމަނިކުފާނުގެ ފަރާތުން އެއްވެސް ބޭފުޅަކު ވެސް އެކަހަލަ އެންގުމެއް އަންގަވައިގފައެއް ނުވާނެއެވެ.

މީގެ އިތުރުން ޑރ މުއިއްޒު ވިދާޅުވީ ބައެއް ރަށްތަކުގައި މަސައްކަތް ހުއްޓާލައި މެޝިނަރީތައް ބާލަމުންދާ ކަމާއި، އެކަން ކުރަނީ މުއިއްޒުގެ އެންގެވުމަށް ކަމަށް ބުނެ ހަގީގަތާތެއް ނެތް ވާހަކަތަކެއް ވެސް ދައްކަމުންދާ ކަމަށެވެ.

Advertisement

ޑރ މުއިއްޒު ވަނީ ވެރިކަން ބަދަލުވުމުގެ މަރުހަލާގެ ތެރޭގައި ބައެއް ކަންކަން ނުކުރުމަށް އެދިވަޑައިގެން ސިޓީފުޅެއް ފޮނުއްވައިފައެވެ.

ކުރިއަށް ނުގެންދަން އަންގަވާފައިވަނީ އާ އިންވެސްޓްމެންޓެއް ނުކުރުމާއި ދައުލަތުގެ އެއްވެސް ބިމެއް ތަރައްގީކޮށް ވިއްކުމުގެ އާ ހުއްދައެއް ނުދިނުމާއި ދައުލަތުގެ އެއްވެސް މުދަލެއްގެ މިލްކުވެރިކަން އެހެން ފަރާތަކަށް ބަދަލުނުކުރުމާއި ބައިނަލްއަގުވާމީ މުއާހަދާތަކާއި އެއްބަސްވުންތަކުގައި ސޮއިކުރުމާއި ދައުލަތުގެ އެއްވެސް ވަޒީފާ އަކަށް އަލަށް މީހުން ނުނެގުމާއި ދައުލަތުގެ ވަޒީފާގައި ތިއްބެވި މީހުންނަށް ވަޒީފާގެ ކުރިއެރުން ދިނުން ފަދަ ކަންކަމެވެ.

މީގެ އިތުރުން އެ ސިޓީގައި މުއިއްޒު ވަނީ ޕީއެސްއައިޕީ އާއި އެހެނިހެން ޕްރޮގްރާމްތަކުގެ ދަށުން އާ ޕްރޮޖެކްޓެއް ނުފެށުމަށާއި ދައުލަތުގެ އެއްވެސް މުއައްސަސާއެއްގެ މުސާރައިގެ އޮނިގަނޑަށް ބަދަލު ނުގެނައުމަށް ވެސް އެދިވަޑައިގެންފައެވެ.