ފަލަސްޠީނުގެ ޣައްޒާއަށް އިޒްރާއިލްގެ ޔަހޫދީން ދެމުންއަންނަ ހަމަލާތަކުގައި ސަބަބުން މުޅި ޣައްޒާވަނީ ކަންބޮޑުވުމާއި ކަރުނަޔާއި ލެއިން ފުރުފައިކަމަށް މަންޒަރު ދެކެމުންދާ ނޫސްވެރިން ބުނެފިއެވެ.

ހަމަލާތަކުން ސަލާމަތްވުމަށް ދެހަމަލާ ދޭތެރެއިން ރައްކާތެރިކަން ހޯދުމަށް ގެތަކުން ނުކުތަސް ޣައްޒާގެ އަޙްލުވެރިން ދާނެ ތަނެއް ނެތެވެ.

ޢައްޒާއިން ނުކުމެވޭނެ ބޯޑަރުގެ ދޮރުތައް ވަނީ ބަންދުކޮށްފައެވެ. މިޞްރަށް ވަދެވޭ ބޯޑަރު ނޫން އެހެން ހުރިހާ ބޯޑަރެއް ބަންދުކޮށްފައިވާއިރު މަގުމައްޗަށް ނުކުތުންވެސް ވަނީ ނުރައްކާތެރި ކަމަކަށްވެފައެވެ.

ނުރައްކާތެރި ހަމަލާތައް ޣައްޒާގެ ޢާންމުން އުޅޭ ސަރަހައްދުތަކަށް ދެމުންދާއިރު ޣައްޒާގައި ކަރަންޓާއި ފެން އަދި ތެޔޮ ވެސް ވަނީ ހުސްވެފައެވެ. ކާބޯތެކެތި ވެސް އެތެރެނުކުރެވޭ ގޮތައް ވަނީ މަގުތައް ބަންދު ކޮށްފައެވެ.

މިހުރިހާ ކަމެއް މިހެން އޮތް އިރު އިޒްރާއިލްގެ ޔަހޫދީން އިންޒާރު ދީފައިވަނީ އެހީ ހިފައިގެން އަންނަ ޣާފިލާތަކަށް ނުވަތަ އެހެންވެސް އުޅަނދުތަކަށް ބޮން އަޅާނެ ކަމަށެވެ.

ޣައްޒާގެ ރައްޔިތުން ތިބީ ނުރައްކާތެރި ބިރުވެރި ފައްތަރެއްގައެވެ. ރައްކާތެރިވާން ރަށުން ބޭރުވެވެން ނެތް އިރު ރަށުގެ އެތެރޭގައި ވެސް ރައްކާތެރިވެވޭނެ ފަދަ ގޮތެއް ވަނީ ނެތިފައެވެ.

އިއްޔެގެ 2:00 ގައި ފަލަސްޠީނުގެ ސިއްޚީ ވުޒާރާއިން ޢާންމުކުރި އަދާހަމަތަކުގައު ވާގޮތުން 1100 މީހަކު ވަނީ ޝަހީދުވެފައެވެ. އޭގެ ތެރޭގައި 326 ކުޑަކުއްޖަކު ހިމެނޭއިރު 171 އަންހެނަކު ހިމެނެއެވެ.

އެކިވަރުގެ އެކި ކަހަލަ ޒަޚަމްތައް ލިބުނު މީހުންގެ ޢަދަދު 5339 އަކަށް އަރާކަމަށް ވަނީ އެ އަދާހަމަތަކުގައި ބުނެފައެވެ. މީގެ އިތުރުން 14 މެޑިކަލް ފެސިލިޓީއަކަށް ބޮން އެޅުމުގެ ސަބަބުން ވަނީ ހަލާކުވެފައެވެ. ޝަހީދުވި މީހުންގެ ތެރޭގައި ސިއްޚީ ޚިދްމަތްތެރިންގެ 10 މީހަކުވެސް ވަނީ ހިމެނިފައެވެ.