ފަލަސްޠީނުގެ ޣައްޒާގައި ގެދޮރު ގެއްލި އެހީތެރިކަމަށް ބޭނުންވެފައިވާ ފަރާތްތަކަށް އިންޓަރނޭޝަނަލް އެއިޑް ކެމްޕޭނުން އިއްޔެ އެހީގެ ތަކެތި ބަހައިފިއެވެ.

އައިއޭސީ އިން އިއްޔެ ވަނީ ހާލުގައި ޖެހިފައިވަ ފަރާތްތަކަށް މިވަގުތައް ބޭނުންވާނެ ބައެއް ތަކެތި ފޯރުކޮށްދީފައެވެ. އެގޮތުން ރަޖާ އަދި "ރެޑީ ޓު އީޓް" ކިޓްތައް ވަނީ ބަހައިފައެވެ.

އަދި މިއަދު ޣައްޒާގައި ހަރަކާތްތެރިވަމުންދާ އައިއޭސީގެ ވޮލެންޓިއަރުން ދަނީ ކައްކާފައިވާ ހޫނު ކާތަކެތި ޙާލުގައި ޖެހިފައިވާ ފަރާތްތަކަށް ފޯރު ކޮށްދިނުމަށް މަސައްކަތް ކުރަމުންނެވެ.

Advertisement

އައިއޭސީ އިން ބުނީ "ރެޑީޓު އީޓް" ޕެކްސްގެ 1000 ޕެކާއި، 2000 ބްލެންކެޓް މިއަދު ބެހުމަށް ހަމަޖެހިފައިވާ ކަމަށެވެ. މީގެ އިތުރުން 2000 "ހޮޓް މީލް" ބެހުމަށް ހަމަޖެހިފައިވާ ކަމަށްވެސް ވަނީ ބުނެފައެވެ. މިތަކެތި ބެހުމަށް ހަމަޖެހިފައިވަނީ ވަގުތީ ހިޔާގެ ގޮތުގައި ޣައްޒާގެ ރައްޔިތުން ބޭނުންކުރަމުން އަންނަ ހަތަރު ސްކޫލެއްގައެވެ.

އިޒްރާއިލްގެ ހަމަލާތައް ފެށުނިއްސުރެ އައިއޭސީގެ ވޮލެންޓިއަރުން ދަނީ އެހީތެރިކަމަށް ބޭނުންވާ  މީހުންނަށް އެހީތެރިކަން ފޯރު ކޮށްދިނުމަށް އެންމެ ކުރީ ސަފުގައި މަސައްކަތްކުރަމުންނެވެ.

އިޒްރާއިލުން ދޭ ނުރައްކާތެރި ރޮކެޓް ހަމަލާތައް ހުއްޓުމެއްނެތި ދެމުންދާއިރުވެސް ފުރާނަ އަތްމައްޗަށް ލައިގެން ނުރައްކަލުގައި އައިއޭސީގެ ވޮލެންޓިއަރުން ދައްކަމުންދަނީ އަޖައިބެއްފަދަ ހިތްވަރެކެވެ.