އިޒްރާއިލްގެ ހައްދުފަހަނަ އެޅި ޔަހޫދީން ދެމުންދާ ހަމަލާތަކުގައި ޝަހީދުވެފައިވާ މީހުންނާއި އަނިޔާވެފައިވާ މީހުންގެ ޢަދަދު ޚިޔާލަށްވެސް ގެންނަން ނޭނގޭ ކަމަށް ޣައްޒާގެ ބިމުން "ވޮއިސް" އަށް މަޢުލޫމާތު ދެއްވި ޑޮކްޓަރ ވިދާޅުވެއްޖެއެވެ.

"ވޮއިސް" އަށް މަޢުލޫމާތު ދެއްވަމުން ޒަޚަމްވެފައިވާ މީހުންނަށް ފަރުވާދެއްވުމުގައި އިންދޮނީސީ ހޮސްޕިޓަލްގައި މަސައްކަތް ކުރައްވާ ޑޮކްޓަރ ވިދާޅުވީ އެހޮސްޕިޓަލްގައި ހުރި ހުރިހާ ބޭހެއް ހުސްވެފައިވާ ކަމަށާއި ފަރުވާދިނުމަށް ކޮންމެހެން ބޭނުންވާ ތަކެތި ހުސްވެފައިވާ ކަމަށެވެ.

މީގެ އިތުރުން ޝަހީދުވާ މީހުންގެ ހަށިތައް އުފުލުމަށް ބޭނުންކުރާ ބޮޑީ ބޭގްތައް ވެސް ވަނީ ހުސްވެފައި ކަމަށް "ވޮއިސް"އަށް މަޢުލުމާތު ދެއްވި އިންދޮނީސީ ހޮސްޕިޓަލުގެ ޑޮކްޓަރ ވިދާޅުވިއެވެ.

"ޝަހީދުންގެ ޢަދަދާއި، ޒަޚަމްވެފައިވާ މީހުންގެ ޢަދަދުތައް ހިތައްގެންނަންވެސް ނޭނގޭ" އޭނާ ވިދާޅުވިއެވެ.

ޑޮކްޓަރ ވިދާޅުވީ ހޮސްޕިޓަލްތަކަށް ކަރަންޓު ދިނުމަށް ބޭނުންކުރާ ޖަނެރޭޓަރު ތަކަށް ބޭނުންކުރާ ތެޔޮ ހުސްވުމަކާއި ވަނީ ގާތްވެފައި ކަމަށާއި، ވަރަށް އަވަހަށް ތެޔޮ ހުސްވެ ތެލާއި ކަރަންޓަށް ހޮސްޕިޓަލްތައް ޖެހޭނެ ކަމަށެވެ.

މީގެ އިތުރުން ޑޮކްޓަރ ވިދާޅުވީ އިއްޔެ އެއް ގަޑިއިރު ތެރޭގައި  ޒަޚަމްވެގެން ގެނެވުނު މީހުންގެ ޢަދަދު 370 އަށް އަރާ ކަމަށެވެ. އަދި އިއްޔެގެ އެއްގަޑިއިރުތެރޭގައި 325 މީހުން ޝަހީދުވެފައިވާ ކަމަށްވެސް އޭނާ ވިދާޅުވިއެވެ.

އިޒްރާއިލްގެ ޔަހޫދީން ޣައްޒާއަށް ހަމަލާދޭން ފެށި ފުރަތަމަ ދުވަހުންފެށިގެން މިހާތަނަށް ހަމައެކަނި އެހޮސްޕިޓަލުން 650 މީހަކަށް ފަރުވާ ދެވިފައިވާ ކަމަށް ވެސް ވިދާޅުވެފައިވެއެވެ.

ފަލަސްޠީނުގެ މިނިވަންކަމަށްޓަކައި ހަނގުރާމަ ކުރާ ހަނގުރާމަވެރިން އިޒްރާއިލުގެ ޔަހޫދީންނަށް ދިން ކުއްލި ހަމަލާއާއި ގުޅިގެން އިޒްރާއިލުން ޣައްޒާއަށް ދޭން ފަށައިފައިވާ ހަމަލާތަކުގެ ސަބަބުން މިހާތަނަށް 1100 މީހަކު ވަނީ ޝަހީދުވެފައެވެ. އޭގެ ތެރޭގައި ގިނަ ޢަދަދެއްގެ ކުޑަކުދިންނާއި އަންހެނުންވެސް ހިމެނެއެވެ. އިޒްރާއިލްގެ ޔަހޫދީން ވައިގެ މަގުން ދެމުންދާ  ވަރުގަދަ ހަމަލާތައް އަމާޒުކުރަމުންދަނީ ޣައްޒާގެ ޢާންމުން ދިރިއުޅޭ ގެތަކަށެވެ.