2024 ވަނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހުގެ އިންތިޚާބުގައި 5 ދާއިރާއަކުން ވާދަކުރުމަށް ޢަދާލަތު ޕާޓީ އިން މަޝްވަރާ ކޮށްފައިވާ ކަމަށް ޢަދާލަތު ޕާޓީގެ ތަރުޖަމާނު ޢަލީ ނަޒީރު ވިދާޅުވެއްޖެއެވެ.

ޢަލީ ނަޒީރު ކުރެއްވެވި ޓްވީޓެއްގައި ވިދާޅުވެފައިވަނީ ރޭ ބޭއްވުނު ޢަދާލަތު ޕާޓީގެ އިދާރީ މަޖިލީހުގެ ބައްދަލުވުމެއްގައި 2024 ވަނަ އަހަރު ބޭއްވޭ ރައްޔިތުންގެ މަޖިލީހުގެ އިންތިޚާބުގައި 5 ދާއިރާއަކަށް ވާދަކުރުމާމެދު މަޝްވަރާ ކުރެވުނުކަމަށެވެ.

"މިކަމާމެދު ގޮތެއް ނިންމުމުގެކުރިން ގޮފިތަކާއި ދާއިރާތަކާ އިތުރަށް މަޝްވަރާކުރުމަށް ވެސް އެއްބަސްވެވުނު" ނަޒީރު ވިދާޅުވެފައެވެ.

Advertisement

ޢަދާލަތު ޕާޓީ ގެ ޓިކެޓުގައި މީގެ ކުރިން ރައްޔިތުންގެ މަޖިލީހަށް ވާދަކޮށް ހޮވިފައިވަނީ ދެބޭފުޅެކެވެ. އެއީ ފަރެސްމާތޮޑާ ދާއިރާގެ މެމްބަރުކަމަށް އިބްރާހިމް މުއްޠަލިބާއި ނޭކުރެންދޫ ދާއިރާއަށް އިންތިޚާބުވި ވަޑައިގެންނެވި އަލްއުސްތާޒާ ޢަނާރާ ނަޢީމެވެ.

ނިމިދިޔަ ރިޔާސީ އިންތިޚާބުގައި ޢަދާލަތު ޕާޓީ އިން މަސައްކަތް ކުރީ އެމްޑީޕީ އާއި އެކު ހެދިފައިވާ ކޯލިޝަންގައެވެ. ރިޔާސީ އިންތިޚާބުގެ ނާކަމިޔާބާއި އެކު ޢަދާލަތުން ބުނެފައިވަނީ އެޕާޓީގެ ސިޔާސީ ހަރަކާތްތައް ވަރުގަދަ ކުރާނެ ކަމަށެވެ.