އިޒްރާއިލުގެ ޔަހޫދީން ޣައްޒާއަށް ދެމުންދާ ނުރައްކާތެރި ހަމަލާތަކުގެ ސަބަބުން ޝަހީދުވި ފަލަސްޠީނުގެ  ހަށިތައް ގިނަވެ ޣައްޒާގެ މޯޗަރީތައް ފުރި އިތުރު ހަށިތައް ބަހައްޓާނެ ޖާގަނެތޭ ހިސާބަށް ޣައްޒާގެ ޙާލަތު ހިނގައްޖެއެވެ.

ބައިނަލްއަޤްވާމީ މީޑިއާ ތަކުން ބުނެފައިވަނީ ޣައްޒާގައި ޝަހީދުވި މީހުންގެ ޢަދަދު މަތިވެ ޖަނާޒާ ބޭއްވެންދެން މީހުންގެ ހަށިތައް ބަހައްޓާލާނެ ޖާގަވެސް މޯޗަރީ ތަކުގައި ނެތިފައިވާ ކަމަށެވެ.

މިއަދު އިޒްރާއިލްގެ ޔަހޫދީން ޣައްޒާގެ ޖަބަލިއާ ރެޒިޑެންޝަލް ކޮމްޕްލެކްސް އަށް ދިން ހަމަލާތަކުގެ ސަބަބުން ހަމަ އެކަނި އެޢިމާރާތުންވެސް 30 މީހުން ވަނީ ޝަހީދުވެފައެވެ.

މީގެއިތުރުން ޣައްޒާގެ މެދުތެރޭގައި ހުންނަ ދެއިރް އަލް ބަލާހް ގައި ހުންނަ ޢާންމުން ދިރިއުޅޭ ސަރަހައްދަށް އިޒްރާއިލްގެ ޔަހޫދީން ދިން ހަމަލާތަކުގައިވެސް 30 މީހަކު ވަނީ ޝަހީދުވެފައެވެ. އަދި 123 މީހަކަށް ވަނީ އެކިވަރުގެ ޒަޚަމްތައް ލިބިފައެވެ.

ފަލަސްޠީނުގެ މިނިވަންކަމަށްޓަކައި ހަނގުރާމަ ކުރަމުންދާ ހަނގުރާމަވެރިން މިމަހުގެ 7ވަނަ ދުވަހު އިޒްރާއިލްގެ ޔަހޫދީންނަށް ދިން ކުއްލި ހަމަލާތަކުގެ ރައްދު ދިނުމުގެ ގޮތުން އިޒްރާއިލުން ފެށި ހަމަލާތަކުގެ ސަބަބުން ޣައްޒާގެ އެތައް ބަޔަކު ވަނީ ޝަހީދުވެފައެވެ. އަދި އެތައްބަޔަކު ވަނީ ޒަޚަމްވެފައެވެ. ޒަޚަމްވީ މީހުންގެ ޢަދަދު ގިނަވެ ޣައްޒާގެ ހޮސްޕިޓަލްތައް ފުރިފައިވާ ކަމަށް ހޮސްޕިޓަލް ތަކުން ވަނީ ބުނެފައެވެ.