ދުނިޔޭގެ އެންމެ ނުފޫޒުގަދަ 500 މުސްލިމު ޝަޚުޞިއްޔަތުގެ ލިސްޓުގައި އިސްލާމީ ޔުނިވަރސިޓީގެ ކުރީގެ ޗާންސެލަރ، އަދި ކުރީގެ އިސްލާމިކް މިނިސްޓަރުގެ ޑރ. މުހައްމަދު ޝަހީމް އަލީ ސައީދު ހިމެނިވަޑައިގެންފިއެވެ.

"ދަ ރޯޔަލް އިސްލާމިކް ސްޓްރެޓީޖިކް ސްޓަޑީސް ސެންޓަރ" ރިސާޗް ފާމް އިން 2009 ވަނަ އަހަރުން ފެށިގެން ކޮންމެ އަހަރެއްގެވެސް ފަހު ކުއާޓާގައި ނެރޭ އެންމެ ނުފޫޒުގަދަ 500 މީހުންގެ ލިސްޓުގައި ޝަހީމްގެ ނަން ހިމެނިވަޑައިގެންފައި ވަނީ، ދީނީ ކަންކަން ތަންފީޒުކުރުމުގެ ދާއިރާގައި ޑރ.ޝަހީމުގެ ޚިދުމަތްތައް ފާހަގަކުރުމުގެ ގޮތުންނެވެ. 

މީގެ ކުރިން އަހަރު ތަކުގައި ވެސް މި ލިސްޓުގައި ޝަހީމް ހިމެނިވަޑައިގަމެންފައިވާއިރު، މިފަހަރު ޑރ. ޝަހީމް ހިމެނިވަޑައިގެންފައިވަނީ 135 ވަނައިގައެވެ. އޭގެ ކުރީ އަހަރުގެ ރޭންކިންގައި ޑރ. ޝަހީމް ހިމެނިވަޑައިގެންފައިވަނީ 145 ވަނައިގައެވެ.  

މި ލިސްޓުގެ އެއްވަނައިގާ ވަނީ ޔަމަނަށް ނިސްބަތްވެވަޑައިގަންނަވާ ދީނީ ޢިލްމުވެރިޔެއް ކަމަށްވާ ޝެއިޚް އަލް-ހަބީބް އުމަރް ބިން ހާފިޒެވެ.  އަދި ލިސްޓުގެ ދެވަނައިގާ ވަނީ ސައުދީ ރަސްގެފާނު ކިންގް ސަލްމާން ބިން އަބްދުލް-އަޒީޒް އަލް-ސައުދެވެ. ތިންވަނައިގާ ވަނީ އިރާނުގެ ސުޕްރީމް ލީޑަރު ސައްޔިދު އަލީ ޚާމެނާއީ އެވެ.

އެންމެ ނުފޫޒުގަދަ 500 މުސްލިމުންގެ ލިސްޓު 15 އަހަރު ނެރެފައިވާއިރު ޑރ. ޝަހީމް ވަނީ ފާއިތުވި 14 އަހަރު މި ލިސްޓުގެ އެކި ރޭންކިންތަކުން ޖާގަ ހޯއްދަވާފައެވެ.

ސިޔާސީ މައިދާނުން ކުރީގެ ރައީސް ޔާމީންގެ ރަނިންމޭޓެއްގެ ގޮތުގައިވެސް ފެނިފައިވާ ޑރ. ޝަހީމްއަކީ ދިވެހިރާއްޖޭގެ އިސްލާމިކް ބޭންކާއި، ވަޤްފު ފަންޑު އަދި ހައްޖު ކޯޕަރޭޝަން އުފެއްދުމުގައިވެސް އިސް ދައުރެއް އަދާކުރައްވާފައިވާ ބޭފުޅެކެވެ.

ދިވެހިރާއްޖޭގެ ސެންޓްރަލް ބޭންކްގެ ޝަރީއާ އެޑްވައިޒަރީ ކޮމިޓީގެ މެންބަރުކަންވެސް ކުރައްވާފައިވާ ޝަހީމް ވަނީ ދީނީ އެކި ފޮތްތައް ނެރުއްވައި، ނުވަ ޤައުމެއްގައި ދީނީ ތަފާތު ފޯރަމްތަކުގައި ތަޤްރީރުކުރައްވާފައެވެ.