ފަލަސްޠީނުގެ މުޖާހިދުންނާއި، އެގައުމަށް ގަދަކަމުން ވެރިވެ، ވަޒަންވެރިވެގެން ތިބި އިސްރާއީލްގެ ޔަހޫދީންނާ ދެމެދު މިހާރު ހިނގަމުންދާ ހަނގުރާމައިގައި، އިސްރާއީލަށް ތާއީދުކޮށް ހުޅަނގުގެ 'އިންފުލުއެންސަރުން' ފަލަސްޠީނުގެ ހާލުގައި ޖެހިފައިވާ ކުދިންގެ ފޮޓޯތައް ދައްކަމުން ދިޔުމާއި ގުޅިގެން މުޅި ދުނިޔޭގެ ކުރިމަތީގައި އެމީހުން ފަޟީޙަތް ވެއްޖެ އެވެ. 

ފަލަސްޠީނުގެ މިނިވަންކަމަށްޓަކައި ހަނގުރާމަ ކުރަމުންދާ ހަނގުރާމަވެރިން ފާއިތުވި ހޮނިހިރު ދުވަހު ދިން ކުއްލި ހަމަލާތަކުގެ ރައްދެއްގެ ގޮތުގައި އިޒްރާއިލްގެ ހައްދުފަހަނައެޅި ޔަހޫދީން ޣައްޒާއަށް ދެމުންދާ ހަމަލާތަކުގައި ޝަހީދުވި މީހުންގެ ޢަދަދު 1417 އަށް އަރައިފައިވާ ކަމަށް ފަލަސްޠީނުގެ ސިއްޚީ ވުޒާރާއިން ބުނެފައިވެއެވެ. 

ފަލަސްޠީނުގެ ސިއްޚީ ވުޒާރާއިން އެންމެ ފަހުން ނެރެފައިވާ އަދާހަމަތަކުގައި ބުނެފައިވަނީ ޝަހީދުވި މީހުންގެ ޢަދަދު 1417 އަށް އަރައިފައިވަ ކަމަށާއި އޭގެ ތެރޭގައި 447 ކުޑަކުދިން ހިމެނޭއިރު، 248 އަންހެނުން ހިމެނެއެވެ.

ޣައްޒާގެ އެކި ދިމާއަށް ދިން ހަމަލާތަކުގައި އެކިވަރުގެ ޒަޚަމްތައް ލިބުނު މީހުންގެ ޢަދަދު ވަނީ 6268 އަކަށް ވަނީ އަރައިފައެވެ. އޭގެ ތެރޭގައި 1531 ކުޑަކުދިންނާއި، 932 އަންހެނުން ހިމެނެއެވެ.

ކަންމިހެން ހުރި ނަމަވެސް ހުޅަނގުގެ މީޑިއާތަކާއި، 'އިންފުލުއެންސަރުން'ނާއި އާޓިސްޓުން މަސައްކަތް ކުރަމުންދަނީ މިހަނގުރާމައިގައި އިސްރާއީލްގެ އަންހެނުންނާއި ޚާއްސަކޮށް ކުޑަ ކުދިންނަށް ވަރަށް ގެއްލުން ތަކާއި އަނިޔާތައް ވެފައިވާ ކަން ހާމަކޮށްދިނުމަށެވެ. ނަމަވެސް، ހަނގުރާމައިގައި ދުނިޔެ ދޫކުރި އެތައް ކުދިން ތިބި ކަމަށް އެމީހުން ބުނަމުންދާއިރު އެ ކުދިންގެ ފޮޓޯ އާއި ވަނަވަރު ވެސް އެމީހުންނަށް ހާމައެއް ނުކުރެވެ އެވެ. 

އަދި އިސްރާއީލް ގެ ކުދިންގެ ފޮޓޯތައް ކަމަށް ބުނެ އެމީހުން ދައްކަމުންދަނީ ހަރުކަށި ޔަހޫދީންގެ ސަބަބުން އަނިޔާވެ ދުނިޔެ ދޫކުރި ފަލަސްޠީނުގެ ތުއްތު ކުދިންގެ ފޮޓޯތަކެވެ. 

އެގޮތުން ދިވެހިންގެ ތެރޭގައިވެސް ވަރަށް މަޝްހޫރު ލަވަކިޔުން ތެރިއެއް ކަމަށްވާ، ޖަސްޓިން ބީބާ، އިސްރާއީލަށް ޓަކައި ދުޢާ ކުރާ ކަމަށް ބުނެ، އިސްރާއީލްގެ ތަނެއް ކަމަށް ހީކޮށް، އިންސްޓަގްރާމް ގައި ޣައްޒާގެ ސުންނާފަތި ކުރެވިފައިވާ އިމާރާތްތަކެއްގެ ފޮޓޯއެއް ވަނީ ހިއްސާ ކޮށްފައެވެ.

ނަމަވެސް ބޭރުގެ ނޫހަކުން ކުރި ދިރާސާއަކުން އެ ފޮޓޯ އަކީ 2021 ވަނަ އަހަރު، އިސްރާއީލް ސިފައިންގެ ހަމަލާތަކުން ސުންނާފަތި ވެފައިވާ ޣައްޒާގެ އިމާރާތް ތަކުގެ ފޮޓޯ އެއްކަން ހާމަވެ، އެތައް ބައެއްގެ ފާޑުކިޔުންތައް އޭނާއަށް އަމާޒުވުމާއެކު، އޭނާ ވަނީ އިންސްޓަގްރާމް ސްޓޯރީ އިން އެ ޕޯސްޓު ޑިލީޓް ކޮށްލާފައެވެ. 

މީގެ އިތުރުން, އެމެރިކާގެ ފިލްމީދާއިރާގަައި މަސައްކަތް ކުރާ ކަމަށްވާ ޖޭމީ ލީކަރޓިސް ވެސް ވަނީ އިސްރާއީލް ކުދިން ކަމަށް ދެކިގެން، ކުޑަ ކުދިން ތަކެއް ބިރުގެންފައި މައްޗަށް ބަލަން ތިބި ފޮޓޯއެއް ހިއްސާ ކުރަމުން "މަތިން ފެންނަމުންދާ ބިރުވެރިކަން" ލިޔެ އިންސްޓަގްރާމް ގައި ޕޯސްޓެއް ކޮށްފައެވެ. 

އިސްރާއީލުގެ ޔަހޫދީންނަށް ތާއީދު ކުރާކަން ފާޅުގައި ހާމަކުރަމުންދާ ޖޭމީ ލީކަރޓިސް، އިސްރާއީލްގެ ކުދިން "އުޅޭ ހާލު" ދުނިޔެއަށް ދެއްކުމުގެ މަގުސަދުގައި މީސްމީޑިއާގައި އާއްމު ކުރި އެ ފޮޓޯ އަކީ ހަގީގަތުގައި ފަލަސްޠީނުގެ ކުދިންގެ ހާލުކަން ހާމަވެ، ގިނަ ބައެއްގެ ފާޑުކިޔުންތައް އޭނާއަށްވެސް އަމާޒުވެގެން ދިޔައެވެ. 

އެއާއެކު އޭނާ ވަނީ އެ ޕޯސްޓު، އިންސްޓަގްރާމް އިން ޑިލީޓް ކޮށްލާފައެވެ. 

އެ ދެމީހުންގެ އިތުރުންވެސް، ހުޅަނގުގެ ގިނަ 'އިންފުލުއެންސަރުން' ތަކެއް ކަމަށްވާ، ބެން ޝެޕީރޯ އާއި، ފްލޮއިޑް މޭވެދަރ ފަދަ މީހުން އިސްރާއީލް އަށް ތާއީދުކޮށް، ފަލަސްޠީނުގެ ޝަހީދުންނަށް ނިސްބަތްކޮށް ދައްކަމުންދާ ވާހަކަ ތަކުން، ގިނަ ބައެއްގެ މެދުގައި އެމީހުންގެ އަސްލު ސޫރަ ފާޅުވެ، މީހުންގެ ފާޑުކިޔުންތައް ދަނީ އަމާޒުވަމުންނެވެ.