އިންޓަރނޭޝަނަލް އެއިޑް ކެމްޕޭނުން ޣައްޒާގެ ހޮސިޕިޓަލް ތަކާއި ރެސްކިޔު ވެހިކަލްތަކަށް ތެޔޮ ފޯރުކޮށްދީފިއެވެ.

އައިއޭސީ އިން ބުނެފައިވަނީ ޣައްޒާގެ އުތުރުގައި ހުންނަ ކަމަލް އެދްވަން ހޮސްޕިޓަލަށް 2000 ލީޓަރުގެ ތެޔޮ ފޯރުކޮށްދެވިފައިވާ ކަމަށެވެ. އަދި ސިވިލް ޑިފެންސުން ބޭނުންކުރާ ރެސްކިޔު ވެހިކަލްތަކަށް 1000 ލީޓަރުގެ ތެޔޮ ފޯރުކޯސްދެވިފައި ވާކަމަށާއި ފަލަސްޠީނުގެ ސިއްޚީ ވުޒާރާގެ ބެލުމުގެ ދަށުގައިވާ އެމްބިޔުލާންސްތަކަށްވެސް 2000 ލީޓަރުގެ ތެޔޮ ފޯރުކޮށްދެވިފައިވާ ކަމަށެވެ.

އިޒްރާއިލުން ޣައްޒާއަށް ދޫކުރުމުންދާ ކަރަންޓު ކަނޑާލައިފައި ވުމުގެ ސަބަބުން ޒަޚަމްވަމުންދާ މީހުންނަށް ފަރުވާ ދެމުންދާ ހޮސްޕިޓަލްތަކުން ބޭނުން ކުރަމުންދަނީ ޖަނެރޭޓަރުތަކެވެ.

Advertisement

އައިއެސީގެ ވޮލެންޓިއަރުން މަސައްކަތުގައި. ފޮޓޯ:އައިއޭސީ

މީގެ އެއްދުވަސް ކުރިން "ވޮއިސް" އަށް މަޢުލޫމާތު ދެއްވި ޣައްޒާގެ އިންދޮނީސީ ހޮސްޕިޓަލްގެ ޑޮކްޓަރު ޢާތިފް އަލްކަހްލޫތް ވިދާޅުވީ ޖަނެރޭޓަރުތަކަށް ބޭނުންކުރާ ތެޔޮ ވަރަށް އަވަހަށް ހުސްވާނެ ކަމަށެވެ. އަދި އެފަދަ ޙާލަތެއް މެދުވެރިވެއްޖެނަމަ ފަރުވާތައް ކުރިއަށް ގެންދެވުމަކީ ނާދިރު ކަމަކަށް ވެގެންދާނެއެވެ.

ރޭ އައިއޭސީ އިން ބުނެފައިވަނީ ޣައްޒާއަށް އެހީ ފޯރުކޮށްދިނުމަށް ދިވެހިންނަށް ހުޅުވާލި ފަންޑަށް ދުވާލަކު 1 މިލިއަން ރުފިޔާ ލިބޭ ކަމަށާއި ރެޔާއި ހަމައަށް 5 މިލިއަން ރުފިޔާ ވަނީ ލިބިފައި ކަމަށެވެ.

އިޒްރާއިލުން ވަނީ ޣައްޒާއަށް ދޫކުރާ ފެނާއި ކަރަންޓާއި ތެލާއި ކަނޑާލައި ކާބޯތަކެތި ވެއްދުމަށް ބޭނުންކުރާ މަގުތައްވެސް ބަންދުކޮށްފައެވެ. އަދި އެހީގެ ތަކެތި ފޯރުކޮށްދިނުމަށް މަސައްކަތް ކުރާނަމަ ހަމަލާދޭނެ ކަމުގެ އިންޒާރުވެސް ވަނީ ދީފައެވެ.

މިދަތިކަމާއި އެކުވެސް އައިއޭސީގެ ވޮލެންޓިއަރުން ދަނީ ޣައްޒާގެ ރައްޔިތުންނަސް އެހީފޯރުކޮށްދިނުމުގެ މަސައްކަތްތައް ކުރަމުންނެވެ.