ޖޯޑަންގައި ފަލަސްޠީނުގެ ރައްޔިތުންގެ ހައްޤުގައި އަޑުއުފުލި މީހުންގެ ތެރެއަށް ޖޯޑަންގެ އަމަންބަލަހައްޓާ ފުލުހުން ކަރުނަ ގޭސް ޖަހައިފިއެވެ.

އިއްޔެ ޖޯޑަން އާއި އިޒްރާއިލާއި ގުޅޭ ބޯޑަރު ކައިރީގައި ކުރިއަށް ދިޔަ އަޑުއުފުލުންތަކުގައި ޖޯޑަންގެ ގިނަ ޒުވާނުންތަކެއް ވަނީ ބައިވެރިވެފައެވެ.

ބޯޑަރު ސަރަހައްދުގެ އިތުރުން ޖޯޑަންގެ އެކި ހިސާބުތަކުގައި އިއްޔެ ވަނީ ޖޯޑަންގެ އެތައް ރައްޔިތުންނެއް ނުކުމެ ފަލަސްޠީނަށް އޮތް ލޯބި ދައްކުވައިދީފައެވެ.

Advertisement

ޖޯޑަން އާއި އިޒްރާއިލް ގުޅޭ ބޯޑަރުކައިރިއަށް އެއްވި ޒުވާނުން އެމީހުންނަށް ޓަކައި އެބޯޑަރު ހުޅުވައިދިނުމަށް ގޮވައިލަމުންދިޔައެވެ. ޖަޒުބާތުގައި ތިބި ޒުވާނުންގެ ޖޯޝާއި އެކު ތަނުގެ ކޮންޓްރޯލް ގެއްލެން ކައިރިވިކަމަށް ބަލައި ފުލުހުން ވަނީ ކަރުނަ ގޭހާއި މުޒާހަރާތައް ކޮންޓްރޯލް ކުރުމަށް ބޭނުންކުރާ ތަކެތި ބޭނުންކޮށްފައެވެ.

ދުނިޔެގެ އެކި ކަންކޮޅުތަކުގައި ދަނީ ފަލަސްޠީނުގައި އިޒްރާއިލްގެ ޔަހޫދީން ހިންގަމުންދާ ހައްދުފަހަނައެޅި އަނިޔާވެރި ޢަމަލުތައް ހުއްޓާލުމަށް ގޮވައިލައި މުޒާހަރަތަކާއި ރެލީތައް ބާއްވަމުންނެވެ.

އޭގެ ތެރޭގައި ހިމެނެނީ ހަމައެކަނި ޢަރަބި އިސްލާމީ ޤައުމުތައް ނޫންކަންވެސް ފާހަގަކޮށްލަން ޖެހެއެވެ. އިޒްރާއިލަށް ވާގިވެރި ވާނެ ކަމަށް ބުނެފައިވާ އިނގިރޭސި ވިލާތުގެ ލަންޑަންގައިވެސް ވަރުގަދަ ރެލީތައް އަންނަނީ ބާއްވަމުންނެވެ.