ފަލަސްޠީނުގައި ހިނގަމުންދާ ހަނގުރާމައިގެ ސަބަބުން ޣައްޒާގެ ޙާލަތު ގޯހުން ގޯހަށް ދާ ކަމަށް ޣައްޒާގެ ބިމުން "ވޮއިސް" އަށް މަޢުލޫމާތު ދެއްވާ މުރާސިލުން ވިދާޅުވެއްޖެއެވެ.

އެގޮތުން އިޒްރާއިލްގެ ޔަހޫދީން ޣައްޒާގެ ރައްޔިތުން ގެ ތެރެއިން ޣައްޒާގެ އުތުރުގައި ދިރިއުޅޭ ފަރާތްތަކަށް ދެކުނަށް ބަދަލުވުމަށް އަންގައިފައިވާ ކަމަށާއި އެއީ ގާތް ގަނޑަކަށް 1.1 މިލިއަން ރައްޔިތުން ކަމަށް  ޣައްޒާއިން މަޢުލޫމާތު ދެއްވާ މުރާސިލުން ވިދާޅުވެއެވެ.

މީގެ އިތުރުން އިޒްރާއިލްގެ ޔަހޫދީން ހުއްޓުމެއް ނެތި ދެމުންދާ ހަމަލާތަކުގެ ސަބަބުން ޒަޚަމްވެފައިވާ މީހުންނަށް ފަރުވާދިނުމަށް މީހުން އެނދުމަތި ކުރެވި ފުރިފައިވާ ދެ ހޮސްޕިޓަލެއް ހުސްކުރުމަށްވެސް އިޒްރާއިލްގެ ޔަހޫދީން ވަނީ އަންގައިފައެވެ. އެދެހޮސްޕިޓަލަކީވެސް ޣައްޒާގެ އުތުރުގައި ހުންނަ ދެ ހޮސްޕިޓަލެކެވެ.

Advertisement

މިއެންގުންތައް މިގޮތައް އަންގަމުން ދިޔުމުން ޣައްޒާގެ އުތުރުގެ ރައްޔިތުން ދެކުނަށް ދަތުރުތައް ފެށުމާއި އެކުވެސް ޣައްޒާއަށް ދެމުންދާ ހަމަލާތައް އިޒްރާއިލުން ގެންދަނީ ކުރިއަށެވެ.

24 ގަޑިއިރު ތެރޭގައި އެހާ ގިނަ ޢަދަދެއްގެ ބަޔަކު އެއްތަނުން އަނެއް ތަނަށް ބަދަލުވުމަކީ ދަތި ކަމަކަށްވާތީ ދެފާރާތުން ވާހަކަ ދެކެވި އިތުރު 6 ގަޑިއިރުގެ ވަގުތުކޮޅެއް ދޭނެ ކަމަށް ވަނީ އިޒްރާއިލްގެ ޔަހޫދީން ވަނީ ބުނެފައެވެ.

ޣައްޒާގެ އުތުރުގައި ދިރިއުޅޭ ގިނަ ބަޔަކު މިހާރު ވަނީ ރަފާ އަށާއި ޚާންޔޫނިސް އަށް ބަދަލުވެފައި ކަމަށްވެސް މުރާސިލުން މައުލޫމާތުދެއެވެ.

ޣައްޒާގައި އިންޓަރނެޓާއި ފޯނުގެ ނެޓްވޯކް ދަށްވެފައިވާތީ މަޢުލޫމާތު ހޯދުމަށާއި މަޢުލޫމާތު ދިނުމަށް ދަށްވެފައިވާ ކަން މުރާސިލުން ފާހަގަ ކުރައްވައެވެ.

އަލްޖަޒީރާގައި ބުނެފައިވަނީ އިއްޔެ ޣައްޒާގެ އެއްފަރާތުން އަނެއްފަރާތައް ބަދަލުވުމަށް ދަތުރުކުރަމުން ދިޔަ  މީހުންނަށް ދިން ހަމަލާތަކުގެ ސަބަބުން ޣައްޒާގެ 320 މީހަކު ޝަހީދުވެފައިވާ ކަމަށެވެ.

"ވޮއިސް" ގެ މުރާސިލުން ވިދާޅުވީ ޣައްޒާގެ ޙާލަތު ވިވަގުތު އޮތީ ވަރަށް ބޮޑަށް ގޯސްވެފައި ކަމަށާއި، އަވަސް އަރުވާލައިގެން ދަތުރު ކުރަމުންދާ މީހުން ވަރަށް ގިނަ ކަމަށެވެ.