ފަލަސްތީނުގެ މައުސޫމު ރައްޔިތުންނަށް އަނިޔާވެރިކަމުގައި ހައްދުފަހަނަ އަޅާފައިވާ އިޒްރާއިލްގެ ޔަހޫދީން ދެމުންދާ އަނިޔާތަކާއެކު، ފަލަސްތީނުގެ މުސްލިމުން އުޅެމުންދާ ހާލުގެ މައްޗަށް ޓްރިއޯ ބޭންޑުގެ ކުރީގެ ލީޑް ވޯކްލިސްޓު މޫސާ ޝިފާއު ޚާއްސަ މަދަހައެއް ތައްޔާރުކޮށްފި އެވެ.
އަހުމަދު ރިފާއު ލިރިކްސް ހަދައި، އަބްދުލްއަލީމުގެ މެލޮޑީއަކަށް ޝިފާއު ކިޔާފައިވާ މި މަދަހައިގެ ނަމަކީ "ކަރުނަ" އެވެ. މި މަދަހައިގައި ސާދާ އިބާރާތުން ވަނީ ފަލަސްތީނުގެ ރައްޔިތުންގެ އުޅޭ ހިތްދަތި ހާލާއި، އެ ރައްޔިތުންގެ ހާލުގެ ދުލުން ކުރަމުންދާ އެތައް އާދޭހެއް ހިއްސާކޮށްފަ އެވެ.
ފަލްސްތީނުގެ އަޚުންނާއި އުޚުތުންނަށް އަމާޒުކޮށް އިޒްރާއިލްގެ ޔަހޫދީން ދެމުންދާ ހަމަލާތަކުގައި އެތައް ބަޔަކު ޝަހީދުވެ، އެތައް ބަޔަކު ޒަޚަމްވެފައިވާއިރު، އެ އަނިޔާތަކުގައި ތަދު މުޅި އިސްލާމީ އުންމަތް ތަހަންމަލް ކުރާކަން އެ މަދަހައިގައި ވަނީ ބަޔާންކޮށްފަ އެވެ.
އަދި ފަލަސްތީނުގެ ހާލާތައި މެދު މުސްލިމު އުންމަތް ހިތާމަކުރާ ކަމަށާއި، އެއް އުންމަތެއްގެ ގޮތުގައި އިސްލާމުން ލައްވާފައިވާއިރު، ފަލަސްތީނުގެ ކޮންމެ މުސްލިމަކަށް ލިބޭ އަނިޔާގައި މުޅި އުންމަތް ޝާމިލުވާހެން، އެ ވޭން އިހުސާސްކުރާކަން އެ މަދަހައިގައި ވަނީ ސިފަކޮށްދީފަ އެވެ.
ޝިފާއުގެ "ކަރުނަ" މަދަހައަކީ އަސަރާއި އާހު އޭގައި އެކުލެވޭ މަދަހައެކެވެ. އިޒްރާއިލުން ހުއްޓުމެއްނެތި ފަލަސްތީނަށް ދެމުންދާ ހަމަލާތަކުގައި މައުސޫމު ކުދިންނާއި އަންހެނުންނަށް ޖިސްމާނީގޮތުންނާއި ނަފްްސާނީގޮތުން ލިބެމުންދާ އަނިޔާތަށް ހިތަށްވެސް ނުގެނެވޭނެކަމަށް މަދަހައިގައި ވަނީ ކިޔައިދީފަ އެވެ.
މުޅި މަދަހަ ބިނާކޮށްފައިވަނީ ފަލަސްތީނުގެ މައުސޫމު ރައްޔިތުންނަށް ޔަހޫދީ އިޒްރާއީލުން ދެމުންދާ ލާއިންސާނީ އަނިޔާތަކުގެ ސަބަބުން އެ އަޚުންނާއި އުޚުތުން އުފުލަމުންދާ ތަކުލީފުތަކުގެ މައްޗަށެވެ. އަދި އެއީ މުސްލިމުންގެ ހައިސިއްޔަތުން ބަލަން ތިބެން ހިތްދަތި މަންޒަރުތަކެއް ކަމަށް މަދަހައިގައި ސިފަކޮށްފައި ވެއެވެ.
މީ މުސްލިމު އުންމަތް އެކަތިގަނޑަކަށްވާންވީ ވަގުތުކަންވެސް މަދަހައިގައި ވަނީ ސިފަކޮށްފައެވެ. އަދި މިއީ ފަލަސްތީނުގެ ރައްޔިތުންނަށް ކުރަމުންދާ އަނިޔާތައް ބަލަން ތިބެންވީ ވައުތު ނޫންކަމަށާއި، މިއީ އެ ރައްޔިތުންނަށް އެހީތެރިވުމަށް މުޅި އިސްލާމީ އުންމަތް ތެދުވާންވީ ވަގުތުކަމަށް ވެސް މަދަހައިގައި ވަނީ ބަޔާންކޮށްފައެވެ.
ފަސްމިނެޓުގެ އެ މަދަހައިގައި ފަލަސްތީނުގެ ރައްޔިތުން ހާލުގެ ދުލުން ގޮވާ އެތައް ވާހަކަތަކެއް ވަނީ ތިލަކޮށްފައެވެ. ސާދާ އިބާރާތުން ފަލަސްތީނު ރައްޔިތުންގެ ކެކުޅުމުގެ ވާހަކަތައް ވަނީ ހިއްސާކޮށްފައެވެ. އަދި މުސްލިމު އުންމަތަށް ވަރުދަމަ މެސެޖުތަކެއްވެސް ރައްދުކޮށްފައި ވެއެވެ.
ފަލަސްތީނުގެ މަންޒަރުތައް އަދާހަމަކޮށް ހިމަނާފައިވާ ވީޑިއޯއާއެކު، ޖަޒުބާތުން ފުރިގެންވާ ވާހަކަތަކުގެ މައްޗަށް އެކުލަވާލާފައިވާ "ކަރުނަ" މަދަހަ އަޑުއަހާލާ ކޮންމެ މީހެއްގެ ދެދޮލުންވެސް ކަރުނަ ފާއްދާލާނެކަން ޔަގީނެވެ.
Advertisement
This content is created and paid for by advertisers and does not involve Voice Journalists
