އިޒްރާއިލުން ފަލަސްޠީނަށް ދެމުންދާ ހަމަލާތަކާއި ފަލަސްޠީނުގައި ވަމުންދާ ކަންކަމުގެ އަސްލު ހަޤީޤަތް ދުނިޔެއަށް އަންގައިދިނުމަށް މަސައްކަތް ކުރާ ޤުދުސް ނިއުސް ނެޓްވޯކްގެ ފޭސްބުކް ޕޭޖް ފޭސްބުކުން "ރިމޫވް" ކޮށްފިއެވެ.
މިކަމާއި ގުޅިގެން ޤުދުސް ނެޓްވޯކް އިން ބުނެފައިވަނީ މެޓާ ކުންފުނިން ދަނީ ޤުދުސް ނެޓްވޯކް އިން ފަލަސްޠީނުގެ ޙާލަތި ގެނެސްދިނުމަށް ކުރާ މަސައްކަތައް އެކިފަހަރު މަތިން ހުރަސް އަޅަމުން ކަމަށާއި، ޤުދުސް ނިއުސް ނެޓްވޯކްގެ ފޭސްބުކް ޕޭޖް ފޭސްބުކުން ރިމޫވް ކޮށްފައިވާ ކަމަށެވެ.
ޤުދުސް ނެޓްވޯކުން ބުނެފައިވަނީ ޤުދުސް ނިއުސް ނެޓްވޯކަކީ ޢަރަބި ބަހާއި އިނގިރޭސި ބަހުން ހިންގާ ފަލަސްޠީނުގެ ޚަބަރު ފަތުރާ އެންމެ ބޮޑު ނެޓްވޯކެވެ. އަދި ޤުދުސް ނެޓްވޯކް ސޯޝަލްމީޑިއާގެ އެކި ވަސީލަތްތަކުގައި ޚާއްސަކޮށް ފަލަސްޠީނާއި މެދުއިރުމަތީގެ އެކި އެކި ޚަބަރުތައް ގެނެސްދޭތާ ވަރަށް ގިނަދުވަސް ތަކެއް ވެފައިވެއްޖެއެވެ.
ޤުދުސް ނެޓްވޯކުން ބުނެފައިވަނީ މެޓާ އިން ފަލަސްޠީނުގެ ޚަބަރުތައް ގެނެސްދޭ މިފަދަ ނެޓްވޯކެއްގެ މަސައްކަތް ހުއްޓުވުމަކީ އިޒްރާއިލްގެ ޑިމާންޑާއި އެއްގޮތައް ކުރާ ކަމެއް ކަމަށާއި، މިއީ ބަސްބުނުމާއި ޚިޔާލު ފާޅުކުރުމުގެ މިނިވަންކަމާއި ޚިލާފު ކަމެއް ކަމަށެވެ.
ޤުދުސް ނެޓްވޯކުން ބުނެފައިވަނީ މެޓާ ކުންފުނީގެ ޢަމަލުތައް މިހެން ހުރި ނަމަވެސް ޤުދުސް ނެޓްވޯކްގެ މަސައްކަތް ހުއްޓުމަކާއި ނުލައި ކުރިއަށްގެންދާނެކަމަށެވެ.
Advertisement
This content is created and paid for by advertisers and does not involve Voice Journalists
