އިޒްރާއިލުން ފަލަސްޠީންގެ ޣައްޒާ އަށް ހަމަލާދިނުމަށް ހުދު ފޮސްފަރެސް ބޭނުން ކޮށްފައިވާ ކަމަށް އެމްނެސްޓީ އިންޓަރނޭޝަނަލް ގައި ބުނެފައިވެއެވެ.

އެމްނެސްޓީ އިން ބުނެފައިވަނީ އިޒްރާއިލުން ހުދު ފޮސްފަރެސް ބޭނުން ކޮށްފައިވާ ކަމުގެ ހެކި އެބަހުރި ކަމަށެވެ.

އިންސާނީ ހައްޤުތަކަށް ގޮވާލާ ޖަމިއްޔާއެއް ކަމަށްވާ އެމްނެސްޓީ އިން ބުނެފައިވަނީ  ޣައްޒާގެ ކަނޑުގެ ބަނދަރާއި އެސަރަހައްދުގައި ހުރި ޓުވަރިސްޓް ހޯޓާތަކަށް މިމަހުގެ 11 ވަނަ ދުވަހު ދިން ހަމަލާތަކުގައި ހުދު ފޮސްފަރެސް ބޭނުން ކޮށްފައިވާ ކަމަށެވެ.

Advertisement

އެމްނެސްޓީ އިން ބުނެފައިވަނީ މިޙަމަލާތައް ދިން ވަގުތު ނަގައިފައިވާ ސެޓެލައިޓް ފޮޓޯ ތައް، ކްރައިސިސް އެވިޑެންސް ލެބޯރެޓަރީގައި ތަހުލީލުކުރުމުން، ހަމަލާދިނުމަށް ބޭނުން ކޮށްފައިވަނީ ހުދު ފޮސްފަރެސް ބޮންކަން ކަށަވަރުވާ ކަމަށް ބުނެފައިވެއެވެ.

ހުދު ފޮސްފަރެސް އަކީ ބައިނަލް އަޤްވާމީ ޤާނޫނު ތަކުގައި މީހުން ދިރިއުޅޭ ސަރަހައްދުތަކުގައި ބޭނުން ކުރުން މަނާ ކޮށްފައިވާ އެއްޗެކެވެ. ހުދު ފޮސްފަރެސް އަކީ އެ ބޭނުން ކުރުމުން އޭގެ ތެރެއަށް ނޭވާލެވިއްޖެނަމަ، ނޭވާލާ ނިޒާމަށް ވަގުތުން ލިބޭ ގެއްލުމުގެ ސަބަބުން ނޭވާ ހާސްވުމާއި، ގައިގައި ޖެހިއްޖެނަމަ ހަށިގަނޑު ފިހުން ފަދަ ކަންކަން ދިމާވާ އެއްޗެކެވެ. އަދި އެ ބޭނުންކޮށްގެން ހަދާ ބޮމުގެ ހަމަލާދިނުމުން ވަގުތުން އެތަނެއްގައި ރޯވެ ބޮޑެތި ގެއްލުންތައް ލިބެއެވެ.

މީގެ ކުރިންވެސް ދެފަހަރެއްގެ މަތިން އިޒްރާއިލުން ވަނީ ފަލަސްޠީނަށް ހުދު ފޮސްފަރެސް ބޭނުން ކޮށްގެން ހަމަލާދީފައެވެ.