ފަލަސްޠީނުގެ ޣައްޒާއަށް އިޒްރާއިލްގެ ޔަހޫދީން ދެމުންދާ ނުރައްކާތެރި ހަމަލާތަކުން ހަމަލާއެއްގައި ޣައްޒާއަށް ނިސްބަތްވާ މަޝްހޫރު ދީނީ ޢިލްމުވެރިޔެއް ކަމަށްވާ ދުކްތޫރް ވާއިލް އަލްޒަރްދު ޝަހީދުވެއްޖެއެވެ.

ޑރ ވާއިލް ޝަހީދު ވެފައިވަނީ އޭނާގެ ގެޔަށް އިޒްރާއިލްގެ ޔަހޫދީން ވައިގެ މަގުން ދިން ހަމަލާއެއްގައެވެ. މިހަމަލާގެ ސަބަބުން ޑރ ވާއިލްގެ މުޅި ގެ އެއްކޮށް ވަނީ ބިމާއި ހަމަވެފައެވެ.

ޑރ ވާއިލް އަކީ އިސްލާމީ ދަޢުވަތު ފެތުރުއްވުމާއި ދީނީ ޢިލްމު ފެތުރުމުގައި ގިނަގުނަ މަސައްކަތްތަކެއް ކުރައްވައިފައިވާ ބޭފުޅެކެވެ.

Advertisement

ޑރ ވާއިލްގެ އިތުރުން ފަލަސްޠީނުގެ ސިޔާސީ ދާއިރާގެ ފުންނާބު އުސް ބޭފުޅެއްކަމަށްވާ ޢަބްދުالله އަލް އައްޣާދް އާއި އޭނާގެ އަނބިމީހާ އާއި ހަތަރު ދަރިންވެސްވަނީ ޣައްޒާގެ ޚާން ޔޫނިސް އަށް އިޒްރާއިލުން ވައިގެމަގުން ދިން ހަމަލާއެއްގައި ވަނީ ޝަހީދުވެފައެވެ.  

އިޒްރާއިލުން ޣައްޒާގެ އަހްލުވެރިންނަށް އަމާޒުކޮށް ދެމުންދާ ހަމަލާތަކުގެ ސަބަބުން 2670 މީހަކު ޝަހީދުވެފައިވާ ކަމަށް ފަލަސްޠީނުގެ ސިއްޚީ ވުޒާރާއިން ވަނީ ބުނެފައެވެ. އަދި 9600 މީހަކަށް ޒަޚަމްވެފައިވާ ކަމަށްވެސް ރޭ އެ ވުޒާރާއިން ހާމަކުރި އަދާހަމަތަކުގައި ބުނެފައިވެއެވެ.

މީގެއިތުރުން ފަލަސްޠީނުގެ ސިވިލް ޑިފެންސްއިން ބުނެފައިވަނީ ހަލާކުވެފައިވާ ޢިމާރާތްތަކުގެ ބައިތަކުގުގެ ދަށުގައި 1000 އަށްވުރެ ގިނަމީހުން ގެއްލިފައިވާނެ ކަމަށް ލަފާކުރާ ކަމަށެވެ.