މި ސަރުކާރުން މަސައްކަތްތެރިންގެ ހައްޤުތަކުގެ ވާހަކަ ދައްކަނީ، އެމީހުންގެ ހައްގުތައް ނުދީ ހިފަހައްޓައިގެން ތިބެކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑެ) ވިދާޅުވެއްޖެ އެވެ.

ބޮންޑެ މިފަދައިން ވިދާޅުވެފައި ވަނީ ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަދައްކަމުންނެވެ. 

އޭނާގެ ވާހަކައިގައި ވަނީ ރައީސް އިބްރާހިމް މުހައްމަދު ޞާލިހުގެ ސަރުކާރުން އިއުލާނުކުރި މަސައްކަތްތައް ނުނިމި، އެ މަޝްރޫއުތަކުގެ އަގުތައް އިންތިހާއަށް އުފުލިގެން ދިޔަ ސަބަބަށް ކުރު ގޮތަކަށް އަލިއަޅުވާލާފަ އެވެ. 

Advertisement

އެގޮތުން ބޮންޑެ ވިދާޅުވީ އަސްލު މައްސަލައަކީ ކުޑަ ރަށެއް ބޮޑު ރަށެއް ނުބަލާ ސަރުކާރުން މަޝްރޫއުތައް އިއުލާނުކުރީ، ޚިދުމަތްތައް ފޯރުކޮށްދިނުމުގެ މަގްސަދަށްވުރެ ބޮޑަށް މާލީ މަންފާ ހޯދުމުގެ ނިޔަތުގައި ކަމަށް ވުން ކަމަށެވެ. މި ސަރުކާރުގެ ފަސް އަހަރުގައި އިއުލާނުކުރި މަޝްރޫއުތައް މުޅިންހެން ދީފައިވަނީ ވަކި ބަޔަކަށް ކަމަށާއި، އެމީހުންނަށް އެޑްވާންސްގެ ގޮތުގައި ލާރިވެސް ދީފައިވާ ކަމަށެވެ. 

އެހެން ނަމަވެސް މަސައްކަތްތައް ނުނިމި ދިގުލައިގެންދާން ފެށުމުން ރައްޔިތުންގެ ފާޑުކިޔުން އަމާޒުވުމުން، އެމީހުން އަތުން މަޝްރޫއުތައް އަތުލާ އެހެން ޕާޓީއަކާއި އަލުން ހަމަ އެ މަސައްކަތް ހަވާލުކުރަމުން ގޮސްފައިވާކަމަށް ބޮންޑެ ވިދާޅުވިއެވެ.

އެގޮތަށް މަޝްރޫއުތައް ހިންގާއިރު، ދައުލަތުން ގިނަ އަދަދެއްގެ ފައިސާ ވަކިބަޔަކަށް ނަގާދީފައިވާ ކަމަށާއި، އެ ފައިސާ ބޭނުންކޮށްފައިވަނީ ރިޔާސީ އިންތިޚާބުގެ ދެވަނަ ދައުރު ރައީސް ޞާލިހަށް ކާމިޔާބުކޮށްދިނުމަށް ކަމަށް ބޮންޑެ ވިދާޅުވި އެވެ. 

އޭގެ އިތުރުން ބޮންޑެ ވިދާޅުވީ ކުދި ވިޔަފާރިވެރިން، ނުވަތަ މަސައްކަތްތެރިން ލައްވާ ކުންފުނިތަކުން އެތައް މަސައްކަތެއް ކުރުވުމަށްފަހު ލާރި ނުދީ ހުރިކަން ފާހަގަކުރެވޭ ކަމަށެވެ. 

މަސައްކަތްތެރިންގެ ހައްގުތައް ރައްކާތެރިކޮށްދިނުމުގެ ނަމުގައި ސަރުކާރުން ބިލު ހުށައަޅާ، މަޖިލީހުގައި އެ ބަހުސް ކުރެވެމުންދާއިރު، ސަރުކާރުން ތިބީ މަސައްކަތްތެރިންނަށް ލިބެންޖެހޭ ލާރި ނުދީ އެމީހުންގެ ހައްގުތައް ހިފަހައްޓައިގެން ކަމަށާއި، އެހެންކަމުން ދައްކާ ވާހަކައާއި އަމަލާއި ދިމާނުވާ މިންވަރު މިކަމުން ހާމަވެގެންދާކަމަށް ބޮންޑެ ވިދާޅުވި އެވެ. 

ބޮންޑޭ ވިދާޅުވީ މި ސަރުކާރުން ރާއްޖޭގައި އޮތް މަސައްކަތްތެރިކަމުގެ ސިނާއަތްތަކުގެ ކުރިމަގާއި ދޭތެރޭގައި އެއްވެސް ވަރަކަށް ވިސްނާފައި ނުވާކަމަށެވެ.

މަސްވެރިކަމަށް ބެލި ނަމަވެސް އަދި ކޮންސްޓްރަކްޝަން އިންޑަސްޓްރީގެ ކަންކަމަށް ބަލާލި ނަމަވެސް ދެމެހެއްޓެނިވި ގޮތެއްގައި މި ސިނާއަތްތައް ފުޅާކުރެވޭނެ ގޮތްތަކަށް ސަރުކާރުން މަސައްކަތްކޮށްފައި ނުވާކަން ފެންނަން އޮތްކަމަށް އޭނާ ވިދާޅުވި އެވެ.