އިޒްރާއިލް އިން ޣައްޒާއަށް ދެމުންދާ ހަނގުރާމައިގައި މިއަދު ކައިވެނި ކުރަން ހަމަޖެހިފައިވާ ޣައްޒާގެ އަންހެނެއް ކަމުގައިވާ ހަދީލް ޝަހީދުވެއްޖެއެވެ.

އިޒްރާއިލްގެ ޔަހޫދީން ދިން ހަމަލާގައި ހަދީލް ޝަހީދުވެފައިވާއިރު ހަދީލްގެ އާއިލާގެ ގިނަ ބަޔަކު ވެސް ވަނީ ޝަހީދުވެފައެވެ.

މިމަހުގެ ހަތްވަނަ ދުވަހުން ފެށިގެން މެދުކެނޑުމެއް ނެތި އިޒްރާއިލްގެ ޔަހޫދީން ދެމުންދާ ހަމަލާތަކުގެ  ސަބަބުން ޣައްޒާގައި 2750 މީހުން ޝަހީދުވެ 9700 މީހުން ޒަޚަމްވެފައިވެއެވެ.

ޣައްޒާގެ އިތުރުން ހުޅަނގު އައްސޭރީގެ ސަރަހައްދުތަކަށް ދެމުންދާ ހަމަލާތަކުގެ ސަބަބުން 58 މީހަކު ޝަހީދުވެ 1250 މީހަކު ވަނީ ޒަޚަމްވެފައެވެ.

އިޒްރާއިލްގެ ހަމަލާތަކުގެ ސަބަބުން ޣައްޒާގެ ގިނަ ޢަދަދެއްގެ ކުޑަކުދިން ވަނީ ޝަހީދުވެފައެވެ. ގިނަ ކުޑަކުދިން ތަކެއް ވަނީ ޔަތީމުވެފައެވެ.

އިޒްރާއިލްގެ ޔަހޫދީން ހިންގަމުންގެންދާ ލާއިންސާނީ ޖަރީމާތަކުގެ ތެރެއިން ރޭ އިޒްރާއިލުގެ ޔަހޫދީން ވަނީ އެބައިމީހުންގެ ހަމަލާތަކެއްގައި ޒަޚަމްވި ބަޔަކަށް އަވަސްފަރުވާ ފޯރުކޮށްދިނުމަށް ދަތުރުކުރި  ސިވިލް ޑިފެންސް ކުރޫ އަކަށް ސީދާ އަމާޒުކޮށް ހަމަލާތަކެއް ދީފައެވެ.