އިޒްރާއިލްގެ ހައްދުފަހަނަ އެޅި ޔަހޫދީން ފަލަސްޠީނުގެ ރައްޔިތުންނަށް އަމާޒުކޮށް ދެމުންދާ ހަމަލާތަކުގެ ސަބަބުން ޣައްޒާގެ 18 ސްކޫލެއް ބޭނުން ނުކުރެވޭ ވަރަށް ސުންނާފަތިވެފައިވާކަމަށް ފަލަސްޠީނުގެ ދައުލަތުގެ މީޑިއާއިން ބުނެފިއެވެ.

އިޒްރާއިލްގެ ހަމަލާތަކުގެ ސަބަބުން 18 ސްކޫލެއް ސުންނާފަތިވެފައިވާއިރު 150 ސްކޫލަކަށް އެކިވަރުގެ ގެއްލުން ލިބި މަރާމާތައް ވަނީ ބޭނުންވެފައެވެ.

އިޒްރާއިލްގެ ލާއިންސާނީ ހަމަލާތަކުގެ ސަބަބުން މިހާތަނަށް ޝަހީދުވި މީހުންގެ ތެރޭގައި 127 މުދައްރިސެއްވެސް ހިމެނޭ ކަމަށް ފަލަސްޠީނުގެ ދައުލަތުގެ މީޑިއާއިން ވަނީ ބުނެފައެވެ.

Advertisement

މީގެ އިތުރުން ހަމަލާތަކުގެ ސަބަބުން އަނިޔާލިބޭ މީހުންނަށް ފަރުވާ ދިނުމުގެ މަސައްކަތުގައި ދުވާލާއި ރޭގަނޑު އެއްކޮށްލައިގެން މަސައްކަތްކުރަމުން އަންނަ މެޑިކަލް އޮފިސަރުންގެ ތެރެއިން 37 މީހަކު އިޒްރާއިލްގެ ލާއިންސާނީ ހަމަލާތަކުގައި ޝަހީދުވެފައިވެއެވެ.

ފަލަސްޠީނުގެ ރައްޔިތުންނަށް އިޒްރާއިލުން ދެމުންދާ ހަމަލާތަކުގެ ސަބަބުން އެތައް ބަޔަކު ޝަހީދު ވެފައިވާ އިރު އޭގެ ތެރެއިން 64 ޕަސެންޓް ޚިއްސާ ކުރަނީ ކުޑަކުދިންނާއި އަންހެނުން ކަމަށްވެސް ފަލަސްޠީނުގެ ދައުލަތުގެ މީޑިއާއި އިން ވަނީ ބުނެފައެވެ.

މީގެއިތުރުން ޣައްޒާގެ ހާލަތު ކަވަރުކުރަމުންދިޔަ ނޫސްވެރިންގެ ތެރެއިން 11 ނޫސްވެރިޔަކުވެސް އިޒްރާއިލްގެ ހަމަލާތަކުގެ ސަބަބުން ޝަހީދުވެފައިވެއެވެ.

ފަލަސްޠީންގެ ޣައްޒާގައި ޝަހީދުވާ މީހުންގެ ޢަދަދު ގިނަވެ މޯޗަރީތައް ފުރި ބާރުވެގެން އައިސްކްރީމް ޓްރަކްތައް ޝަހީދުވެފައިވާ މީހުންގެ ހަށިތައް ބެހެއްޓުމަށް މިހާރު ދަނީ ބޭނުންކުރަމުންނެވެ.