އިސްރާއީލުން ފަލަސްތީނުގެ ޣައްޒާ އަށް ދެމުން އަންނަ ހަމަލާތަކާ ގުޅިގެން ފަލަސްތީނުގެ އާންމު ރައްޔިތުންނަށް އެހީތެރިވުމުގެ ގޮތުން ރާއްޖޭގައި ކުރިއަށް ގެންދާ ޓެލެތޯންއަށް އެސްޓީއޯގެ ފަރާތުން އެއް މިލިއަން ރުފިޔާ ހަދިޔާ ކޮށްފިއެވެ. 

ފަލަސްތީނުގެ ހާލުގައި ޖެހިފައިވާ އެ މުސްލިމު އަޚުންނާއި އުޚުތުންނަށް އެހީތެރިވުމަށް އިންޓަނޭޝަނަލް އެއިޑް ކެންޕެއިން އިން "ޣައްޒާ އެމެޖެންސީ ރިލީފް ފަންޑް" ގެ ނަމުގައި މިދިޔަ ހަފްތާގެ އާދިއްތަ ދުވަހު ފަންޑެއް ހުޅުވާލާފައިވާއިރު އެ ފަންޑަށް ގިނަ އަދަދެއްގެ ފަރާތްތަކުން އަންނަނީ ފައިސާގެ އެހީތެރިކަން ފޯރުކޮށްދެމުންނެވެ. 

މި ފައިސާ ހަދިޔާ ކުރިިކަން ހާމަކޮށް އެސްޓީއޯ އިން ނެރެފައިވާ ބަޔާނެއްގައި ބުނެފައިވަނީ ދިވެހިރާއްޖޭ އިސްލާމްވީ ދުވަސް މި ފަހަރު ދިމާވެފައި މިވަނީ  ފަލަސްތީނުގެ ރައްޔިތުންނާއި ދެކޮޅަށް އިސްރާއީލުން ލާއިންސާނީ އުދުވާނެއް ހިނގަމުންދާ ދަނޑިވަޅުކާއި ކަމުގައެވެ. 

އެހެންކަމުން ރާއްޖޭގެ އެންމެ ބޮޑު ކުންފުނީގެ ހައިސިއްޔަތުން، ދިވެހި ރައްޔިތުންގެ މި ހަރަކާތުގައި އެސްޓީއޯ ގްރޫޕްގައި ހިމެނޭ، އެސްޓީއޯ، މިފްކޯ، އެލައިޑް އިންޝުއަރެންސް، އެފްއެސްއެމް، މޯލްޑިވްސް ގޭސް އަދި އެމްއެމްއެސް އިން ރައްޔިތުންނާއި އެކުގައި ތިބިކަމުގެ ޔަގީންކަން އަރުވާކަމުގައި އެ ބަޔާނުގައި ވެއެވެ. 

އެގޮތުން "އަހަރުމެން ފަލަސްތީނާއެކު" ޓެލެތޯންއަށް އެ ކުންފުނިތަކުގެ މުވައްޒަފުންނާއި ހިއްސާދާރުންގެ ނަމުގައި އެއް މިލިޔަން ރުފިޔާ މިހާރު ހަވާލުކުރެވިފައިވާކަމަށް އެ ބަޔާނުގައި ވަނީ ބުނެފައެވެ.