ފެނަކައިން ދަރާފައިވަނީ ހަމައެކަނި ކުދި ކުންފުނި ތަކަށް ނޫން ކަމަށާ، އެކުންފުނިން އެސްޓީއޯއަށްވެސް ތެލުގެ ފައިސާ ދެއްކި ދުވަހެއްވެސް އެނގިނުލައްވާ ކަމަށް ހުޅުދޫ ދާއިރާގެ މެންބަރު އިލްޔާސް ލަބީބު ވިދާޅުވެއްޖެ އެވެ. 

ރައްޔިތުންގެ މަޖިލީހުގެ މިއަދުގެ ޖަލްސާގައި މަޑުއްވަރި ދާއިރާގެ މެންބަރު އާދަމް ޝަރީފް ހުށަހަޅުއްވާފައިވާ، ފެނަކައިން ކުދި ވިޔަފާރިތަކާއި ކުންފުނިތަކަށް ދޭންޖެހޭ ފައިސާދިނުން އަވަސްކުރުމަށާއި ފެނަކައިގެ މެނޭޖްމަންޓް އަދި ފައިނޭންޝަލް އޮޑިޓެއް ހެދުމަށާއި ދަރަނިތައް އަދާކުރާނެގޮތުގެ ޕްލޭނެއް އެކުލަވާލުމަށް ގޮވާލައި ހުށަހަޅާ ޤަރާރަށް ތާއިދު ކުރައްވާ ބަހުސް ކުރައްވަމުން އިލްޔާސް، އެ ގަރާރުގައި ފެނަކައިގެ ދަރަނީގެ ގޮތުގައި 2.8 ބިލިއަން އޮތް ކަމަށް ބުނެފައި ވީ ނަމަވެސް، މިހާރު އެ އަދަދު 3.5 ބިލިއަން ރުފިޔާއަށްވުރެ ބޮޑު ވެފައިވާނެ ކަމަށެވެ. 

އިލްޔާސް ވިދާޅުވީ ފެނައިން އެސްޓީއޯއަށް ދައްކަންޖެހޭ، ތެޔޮ ބިލާއި ގުޅިގެން އެސްޓީއޯ އިން ބުނާ އަދަދާ ފެނަކައިން ދޭ މައުލޫމާތާ ވެސް ދިމާނުވާ ކަމަށެވެ. އަދި ފެނަކައިގެ ދަރަނީގެ ސަބަބުން ކުދި ވިޔަފާރިތަކުގެ އިތުރުން އެސްޓީއޯ ވެސް ބަނގުރޫޓު ވަމުންދާ ކަމަށް އިލްޔާސް ވިދާޅުވި އެވެ. 

އިލްޔާސް ވިދާޅުވީ، ފެނަކައިން އެސްޓީއޯ އަށް ފައިސާ ނުދެއްކި ނަމަވެސް، އެ ކުންފުންޏަށް ގަވާއިދުން ތެޔޮ ސަޕްލައިކޮށްދޭންޖެހޭ ކަަމަށެވެ. އަދި އެކަން ކުރުމަށްޓަކައި އެސްޓީއޯއިން ލޯނު ނެގުމަށް ވެސް ސަރުކާރުން އަންގަމުންދާ ކަމަށްވެސް އިލްޔާސް ތުހުމަތު ކުރެއްވިއެވެ. 

މީގެ އިތުރުން ވެސް އިލްޔާސް ވިދާޅުވީ، އާއްމުގެ ބައެއް ފަރާތްތަކުގެ ކުދި ވިޔަފާރިތަކަށް ފެނަކައިން ދޭންޖެހޭ ފައިސާ ނުދިން ނަމަވެސް، މަޖިލީހުގެ ބައެއް މެންބަރުންގެ ހިއްސާ އޮންނަ ކުންފުނިތަކަށް ފެނަކައިން ދޭންޖެހޭ ފައިސާ ގަވާއިދުން ދެމުންދާ ކަމުގެ ޝަކުވާވެސް ލިބެމުންދާ ކަމަށެވެ. އެހެން އެކަން ވުމުން ކުދި ވިޔަފާރިތައް އެއްކޮށް ބަނގުރޫޓު ވެފައިވާ ކަމަށް އިލްޔާސް ވިދާޅުވި އެވެ. 

އެހެންކަމުން، އެ މައްސަލަތައް ބަލައި، ވިޔަފާރިތަކަށް ލިބެންޖެހޭ ފައިސާތައް ލިބޭނެ ގޮތް ހަދައިދޭންޖެހޭ ކަމަށް އިލްޔާސް ވިދާޅުވި އެވެ.