ފަލަސްޠީނުގެ 900 އެއްހާ މީހުން ޝަހީދުވި، އަލް އަހްލީ ހޮސްޕިޓަލަށް ދިން ހަމަލާ އަށް ފަހު، އެހަމަލާއަކީ "ޓެރަރިސްޓް ބޭސް" އަކަށް ދިން ހަމަލާއެއްކަމަށް އިޒްރާއިލްގެ ބޮޑު ވަޒީރު ނަތަންޔާހޫގެ ސޯޝަލް މީޑީއާ އެޑްވައިޒަރ ހަނަންޔާ ނަފްތަލް ބުނެފިއެވެ.

އަލް އަހްލީ އަށް ދިން ހަމަލާއަށް ފަހު އޭނާ ކޮށްފައިވާ ޓްވީޓެއްގައި ބުނެފައިވަނީ އިޒްރާއިލްގެ އެއަރފޯސް އިން ޣައްޒާގެ ހޮސްޕިޓަލެއްގެ ތެރޭގައި ހިންގަމުންދާ "ޓެރަރިސްޓް ބޭސް"އަކަށް ހަމަލާދީފައިވާކަމަށެވެ.

"އެތައް ޓެރަރިސްޓުންނެއް ވަނީ މަރުވެފައި" ހަނަންޔާ ބުނެފައިވެއެވެ.

Advertisement

މި ޓްވީޓުގައި އޭނާ އިތުރަށް ބުނެފައިވަނީ ހަމާސް އިން ހޮސްޕިޓަލް ތަކާއި މިސްކިތްތަކުން ރޮކެޓް ލޯންޗް ކުރަމުންދާ ދިޔުމާއި ޢާންމު ރައްޔިތުން އިންސާނީ ޝީލްޑް ތަކެއްގެ ގޮތުގައި ބޭނުންކުރަމުންދާ ކަމަކީ ހިތާމަހުރި ކަމެއް ކަމަށެވެ.

ހަންނަޔާ މިހެން ބުނެފައިވާއިރު، އަލް އަހްލީ އަށް ދިން ހަމަލާގައި 900 އެއްހާ މީހުން ޝަހީދުވެފައިވާއިރު އެތައް ބަޔަކު ވަނީ ޒަޚަމްވެފައެވެ.

އަދި އަލް އަހްލީ ހޮސްޕިޓަލަކީ ގިނަ ޢަދަދެއްގެ ބަޔަކު، އެހެން ތަންނަތަނަށްވުރެ ބޮޑަށް ރައްކާތެރިކަން ލިބޭނެ ކަން ޤަބޫލު ކޮށް ވަގުތީ ހިޔަލެއްގެ ގޮތުގައި އާއްމު ރައްޔިތުން ބޭނުންކުރަމުން ދިޔަ ތަނެކެވެ. އެހޮސްޕިޓަލަކީ ކްރިސްޓިއަނުންގެ ބަޔަކު ފަންޑުކޮށްގެން ހިންގާ ތަނެއް ކަމަށްވެސް "ވޮއިސް"ގެ މުރާސިލް ވަނީ ވިދާޅުވެފައެވެ.