ފަލަސްޠީނުގެ ޢާންމުންނަށް އިޒްރާއިލުން ދެމުންދާ ހަމަލާތަކުގެ ތެރެއިން ރޭ ޣައްޒާގެ އަލްއަހްލީ ހޮސްޕިޓަލަށް ދިން ހަމަލާއަށްފަހު އެހޮސްޕިޓަލްގެ ޑޮކްޓަރުން ބޭއްވި ނޫސްވެރިންގެ ބައްދަލުވުން ޝަހީދުވީ މީހުންގެ ހަށިތަކާއި އެކު ބާއްވައިފިއެވެ.

މިނޫސްވެރިންގެ ބައްދަލުވުމުގައި ވާހަކަދެއްކެވި ޑޮކްޓަރ ވިދާޅުވީ އެތަނުން އެފެނިގެން ދިޔަ މަންޒަރުތަކަކީ ދުނިޔޭގެ އެއްވެސް ޤައުމަކުން އެއްވެސް ފިލްމަކުން އަދި ކިއެއްތަ ޚިޔާލަށްވެސް ނުފެންނާނެ ފަދަ މަންޒަރެއް ކަމަށެވެ.  އަދި އިންސާނިއްޔަތާއި ޚިލާފަށް ހިންގޭ މިޖަރީމަތަކަކީ އޭގެ އަނިޔާވެރިކަމުގެ އެންމެ މަތީ ދަރަޖައިގައި ހިމެނިގެން ދާނެ ފަދަ ކަންކަން ކަމަށްވެސް އޭނާ ވިދާޅުވިއެވެ.

" އެމީހުން އިޒްރާއިލްގެ ކުޑަކުދިންގެ ބޯ ތައް ކަނޑާލިޔޭ ބުނެ ދޮގުހެދި ،މިއަދު އަހަރެމެން މި ދައްކަނީ އަހަރެމެންގެ ކުދިންގެ ބޯތައް ކަނޑައި، ކުދިންގެ ބަނޑުތައް ފަޅައިފައި ހުރި މަންޒަރު، މިކުދިންގެ ޢާއިލާއަކީ ކޮބައިކަންވެސް ވަކިނުވޭ، މިޖަރީމާތައް ދުނިޔެއަކަށް ނުފެނޭ" ނޫސްވެރިންގެ ބައްދަލުވުމުގައި ވާހަކަދެއްކެވި ޑޮކްޓަރ ވިދާޅުވިއެވެ.

Advertisement

ޑޮކްޓަރ މުޅި ދުނިޔެއަށް ގޮވައި ލެއްވީ މިމައްސަލައިގައި އަވަސް ފިޔަވަޅު ތަކެއް އަޅައިދެއްވުމަށެެވެ. 

"ބަސްނުބުނެ ތިބޭ ތިބުމުން އިސްރާއިލްގެ ޖަރީމާތައް ވަނީ އިތުރު" ޑޮކްޓަރ ވިދާޅުވިއެވެ.

އަލް އަހްލީ ހޮސްޕިޓަލަށް އިޒްރާއިލުން ރޭ ދިން ހަމަލާގައި 900 އެއްހާ މީހުން ވަނީ ޝަހީދުވެފައެވެ. އަލްއަހްލީ ހޮސްޕިޓަލަކީ ޣައްޒާގެ އެންމެ ދުވަސްވީ ހޮސްޕިޓަލެވެ. އެހޮސްޕިޓަލް ރެޔާއި ހަމައަށް ބޭނުން ކުރެވެމުންދިޔައީ ހަމައެކަނި ޒަޚަމްވަމުން ދިޔަ މީހުންނަށް ފަރުވާ ދިނުމަށް އެކަންޏެއްނޫނެވެ.

ރެއާއި ހަމައަށް އަލްއަހްލީ ހޮސްޕިޓަލްގައި އެތައް ބަޔަކު ވަގުތީ ހިޔާ ހޯދަމުން ގޮސްފައިވެއެވެ. އަލްއަހްލީ އަށް ދިން ހަމަލާއަށްފަހު ނަތަންޔާހޫގެ ސޯޝަލް މީޑިއާ އެޑްވައިޒަރު ބުނެފައިވަނީ ޓެރަރިސްޓް ބޭސް އަކަށް ހަމަލާދިން ކަމަށެވެ.