ހައްދުފަހަނައަޅާފައިވާ އިސްރާއީލްގެ ސިފައިން، ފަލަސްޠީނުގައި ހިންގަމުންދާ ލާ އިންސާނީ ޖަރީމާތަކަށް ހިތްވަރުދީ، އިސްރާއީލްއަށް ތާއީދު ކުރާކަން ހާމަކުރުމަށް، އެމެރިކާގެ ރައީސް ޖޯއީ ބައިޑެން، ފަލަސްޠީނުގެ އަތުން ގަދަކަމުން ފޭރިގެން ޔަހޫދީން ދިރިއުޅެމުންދާ ބިމަށް އަތުވެއްޖެއެވެ.  

ފަލަސްޠީނުގެ އަތުން ފޭރިގަން ޔަހޫދީން ވަޒަންވެރިގެން ތިބި ބިމަށް މިއަދުގެ ވަގުތެއްގައި ބައިޑެން ގޮސްފައިވަނީ ވަރުގަދަ ސެކިޔުރިޓީ އާއި އެކުގައި ކަމަށް ބޭރުގެ މީޑިއާ ތަކުން މައުލޫމާތު ދެއެވެ. އޭނާއަށް މަރުހަބާ ކިޔާފައިވަނީ އިސްރާއީލްގެ ހައްދުފަހަނައަޅާފައިވާ ބޮޑުވަޒީރު ބެންޖަމިން ނަތަންޔާހޫ އެވެ. 

ނަތަންޔާހޫ އާއި ބައިޑަން އާއި ދެމެދު މިއަދުގެ ވަގުތެއްގައި ބައްދަލުވުމެއް ވެސް ބޭއްވިފައިވާ އިރު، އެ ބައްދަލުވުމުގައި ބައިޑަން ވަނީ، ރޭގަ ވަގުތެއްގައި ޣައްޒާގެ އެތައް ރައްޔިތުން ހިމާޔަތް ހޯދައިގެން ތިބި ހޮސްޕިޓަލަށް ޔަހޫދީ ސިފައިން ދިން ހަމަލާއާއި ގުޅޭ ގޮތުންވެސް ވާހަކަދައްކާފައެވެ. އެގޮތުން، އޭނާ ބުނެފައިވާ ގޮތުގައި، އެ ހަމަލާ ދީފައިވަނީ, އިސްރާއީލުންނެއް ނޫނެވެ. އެހެނެއްކަމަކު އެއީ ހަމާސް އިން ދިން ހަމަލާއެކެވެ. 

Advertisement

ޣައްޒާގެ ހޮސްޕިޓަލަށް ރޭ ދެވުނު ޓެރަރިސްޓް ހަމަލާގައި ޝަހީދުވި ބައެއް މީހުންގެ ހަށިތައް

ބައިޑެން އެހެން ބުނި ނަމަވެސް، އެ ހަމަލާ އަކީ އިސްރާއީލްގެ ސިފައިން ދިން ހަމަލާއެއް ކަމަށް އެމީހުން ވަނީ މީޑިއާ ތަކަށް ކުރިން މައުލޫމާތު ދީފައެވެ. އަދި އެ ހަމަލާ ދީފައިވާ ހޮސްޕިޓަލަކީ "ޓެރަރިސްޓް ބޭސް" އެއް ކަމަށާ، ހަމަލާ އެތަނަށް އަމާޒުކުރީ އެހެންވެގެން ކަމަށްވެސް ޔަހޫދީ ސިފައިން ވަނީ ބުނެފައެވެ. 

ނަމަވެސް އެފަހުން މިހާރު އެމީހުންވެސް  މަސައްކަތް ކުރަމުން ދަނީ ހޮސްޕިޓަލަށް އަމާޒުވެފައިވަނީ ފަލަސްތީނުގެ އިސްލާމިކް ޖިހާދުގެ ފެއިލްވެފައިވާ ރޮކެޓް ހަމަލާއެއް ކަން ސާބިތު ކުރުމަށެވެ. 

ޔަހޫދީންގެ އެ ހަމަލާއިން އެކަނިވެސް، 800 އަށްވުރެ ގިނަ މުސްލިމުން ވަނީ ޝަހީދު ކޮށްލާފައެވެ. އަދި މިހާތަނަށް ޔަހޫދީންގެ ގަތުލު އާއްމުގައި 3300 އަށްވުރެ ގިނަ މުސްލިމުން ވަނީ ޝަހީދު ވެފައެވެ.