މިއަދު ހެނދުނު ދޫނިދޫ އާއި ފުނަދޫއާ ދޭތެރޭ ކަނޑުމަތިން މަރުވެފައިއޮއްވައި ފެނިފައިވަނީ ރޭ މާލޭ ރަސްފަންނާއި ދިމާއިން މޫދަށް ފުންމާލި މީހެއް ކަމަށާއި އެކަމުގެ ރިޕޯޓް ލިބިފައިވާ ކަމަށް ފުލުހުން ބުނެފިއެވެ.

ފުލުހުން ބުނެފައިވަނީ ރަސްފަންނާއި ދިމާއިން ރޭ ފިރިހެނަކު މޫދަށް ފުންމާލި ކަމުގެ ރިޕޯޓް ރޭގެ 19:25 އެހާއިރު ލިބިފައިފާ ކަމަށެވެ.

މި މައުލޫމާތު ލިބިގެން ފުލުހުން އެސަހަރައްދަށް ގޮސް ބެލިއިރު ފުންމާލި މީހާ މޫދުގައި ފެންނަން އޮތުމުން ސީންއަށް އެޓެންޑްވި ފުލުހަކު އެމީހާ ސަލާމަތްކުރުމަށް މޫދަށް ފުންމާލައިގެން މަސައްކަތްކޮށްފައިވާ ކަމަށެވެ.

Advertisement

އަދި ފުންމާލި ފުލުސްމީހާ މޫދުގައި އޮތް މީހާއާއި ހަމައަށް ފަތައިފައި ދިޔުމުގެ ކުރިން އެމީހާ ވަނީ ވީނުވީއެއް ނޭނގި ގެއްލިފައި ކަމަށް ފުލުހުން ބުންޏެެވެ. 

އެމީހާ އެސަރަހައްދުން ނުފެނިގެން އެމްއެންޑީއެފްއަށް އެކަން ރިޕޯޓް ކުރުމުން އެމްއެންޑީއެފުންވެސް އޭނާ ހޯދުމުގެ މަސައްކަތް ކޮށްފައިވާ ކަމަށް ފުލުހުން މައުލޫމާތުދެއެވެ. 

އެމްއެންޑީއެފުން ބުނެފައިވަނީ މާލޭ އޭރިއާ ކޯސްޓްގާޑް ސެކަންޑް ސްކޮޑްރަންއިން ވަނީ ރެއިން ފެށިގެން ހަރަކާތްތެރިވެ، އެ މީހާ ހޯދުމުގެ ގޮތުން މިއަދު ހެނދުނު ކޯސްޓްގާޑް ސެކަންޑް ސްކޮޑްރަންގެ ޑައިވަރުން ވަނީ ރަސްފަންނު ކައިރި ކަނޑުއަޑިން 41590 އަކަ މީޓަރުގެ ސަރަހައްދެއް ބަލާފައި ކަމަށެވެ.

އަދި އެމީހާގެ ހަށިގަނޑު ފެނިފައިވަނީ، ދޫނިދޫ ކައިރިން ދަތުރުކުރި އެމްޓީސީސީގެ ފެރީގެ ފަޅުވެރިންނަށް ކަމަށާއި، ހަށިގަނޑު ފެނިގެން އެމްއެންޑީއެފް ކޯސްޓްގާޑަށް ރިޕޯޓްކޮށްފައި ވަނީ މިއަދު ހެނދުނު 09:19 ހާއިރު ކަމަށްވެސް އެމްއެންޑީއެފުން ބުނެފައިވެއެވެ.

މި މީހާ އަކީ 41 އަހަރުގެ ދިވެހި ފިރިހެނެށްކަމަށާއި، އޭނާގެ ހަށިގަނޑު އެމްއެންޑީއެފް ކޯސްޓްގާޑް ފަސްޓް ސްކޮޑްރަންއިން މާލެ ގެނެސް، މިހާރު އާއިލާއާއި ހަވާލުކޮށްފައިވާކަމަށް ފުލުހުން ވަނީ ބުނެފައެވެ.