މަސްޖިދުލް އަޤުޞާއަކީ މުސްލިމުންގެ ހައްގެއް ކަމަށާ، އެހެންނަމަވެސް އެ މިސްކިތް މިހާރު ވަނީ ޒަޔަނިސްޓް ޔަހޫދީންގެ އިސްތިޢުމާރުގެ ދަށުގައި ކަމަށް މިއަދުގެ ޚުތުބާގައި ބުނެފިއެވެ. 

މަސްޖިދުލް އަޤުޞާ ގެ މާތްކަން މި މައުލޫއަށް މިއަދު އަކިއަޅުވާލާފައިވާ ޚުތުބާގައި ބުނީ، މިސްކިތް ތަކަކީ މާތް الله މި ބިންމަތީގައި ލައްވާފައިވާ އެންމެ މާތް ބިނާ ކަމަށެވެ. އަދި އޭގެ ތެރެއިންވެސް ، މާތް الله ގެ ހަޟުރަތުގައި މާތްކަން ބޮޑުވެގެންވާ ތިން މިސްކިތެއްގެ ވާހަކަ ކީރިތި ގުރުއާނާއި ރަސޫލާ ޞައްލައްالله ޢަލައިހި ވަސައްލަމް ގެ ސުންނަތުން އެނގޭކަމަށާ، އެއީ ތިން މިސްކިތަކީ، މައްކާގައިވާ އަލް މަސްޖިދުލް ޙަރާމް އާއި، މަދީނާގައިވާ އަލް މަސްޖިދުލް ނަބަވީ އަދި ޤުދުސްގައިވާ އަލް މަސްޖިދުލް އަޤުޞާ ކަމަށް ޚުތުބާގައި ބުންނެވެ. 

ޚުތުބާގައި ބުނީ، މަސްޖިދުލް އަޤުޞާ އަކީ މުސްލިމުންގެ ފުރަތަަމަ ގިބްލަ ކަމަށާ، ރަސޫލާ ޞައްލައްالله ޢަލައިހި ވަސައްލަމް ހިޖުރަ ކުރެއްވުމަށް ފަހުގައިވެސް ސޯޅަ މަސްދުވަސް ވަންދެން މުސްލިމުންގެ ޤިބުލައިގެ ގޮތުގައި ވީ އެމިސްކިތް ކަމަށެވެ.  

މިއާއެކު ޚުތުބާގައި ވަނީ މަސްޖިދުލް އަޤުޞާގެ މާތްކަން ހާމަވެގެންދާ ކީރިތި ޤުރުއާނުގެ އާޔަތްތަކަށް އަލިއަޅުވާލާފައެވެ. 

""އެކަލާނގެ ހުސްޠާހިރުވަންތަކަމާއެވެ! އެކަލާނގެއީ، އަލްމަސްޖިދުލް ޙަރާމުން، އަލްމަސްޖިދުލް އަޤްޞާއަށް އެކަލާނގެ އަޅާ، ރޭގަނޑުން ބައެއްގައި ގެންދެވި ރަސްކަލާނގެއެވެ. އެއީ އެތާނގެ ވަށައިގެން، ތިމަންރަސްކަލާނގެ ބަރަކާތް ލެއްވި ތަނެވެ. (އެއީ) ތިމަންރަސްކަލާނގެ ކުޅަދުންވަންތަކަމުގެ ހެކިތަކުގެ ތެރެއިން ބައެއް، އެކަލޭގެފާނަށް ދެއްކެވުމަށްޓަކައެވެ. ހަމަކަށަވަރުން، އެކަލާނގެއީ، މޮޅަށް އައްސަވާވޮޑިގެންވާ، މޮޅަށް ބައްލަވާވޮޑިގެންވާ ރަސްކަލާނގެއެވެ." އަދިވެސް އެ ބިމުގެ މާތް ކަމާއި ބެހޭގޮތުން މާތް الله ސުބްޙާނަހޫ ވަތަޢާލާ ވަހީކުރައްވާފައިވެއެވެ.

"وَنَجَّيْنَاهُ وَلُوطًا إِلَى الْأَرْضِ الَّتِي بَارَكْنَا فِيهَا لِلْعَالَمِينَއަދި ތިމަންރަސްކަލާނގެ އެކަލޭގެފާނާއި، ލޫޠުގެފާނު ސަލާމަތްކުރައްވައި، ޢާލަމްތަކަށްޓަކައި، ތިމަންރަސްކަލާނގެ ބަރަކާތްލެއްވި ބިމަށް ފޮނުއްވީމެވެ." އަދިވެސް އެ ބިމަކީ މާތް الله ސުބްޙާނަހޫ ވަތަޢާލާ މާތް ކުރައްވާފައިވާ ބިމެއްކަން ހާމަކުރައްވައި ވަހީކުރައްވާފައިވެއެވެ.

وَلِسُلَيْمَانَ الرِّيحَ عَاصِفَةً تَجْرِي بِأَمْرِهِ إِلَى الْأَرْضِ الَّتِي بَارَكْنَا فِيهَا ۚ وَكُنَّا بِكُلِّ شَيْءٍ عَالِمِينَއަދި ތިމަންރަސްކަލާނގެ، ސުލައިމާނުގެފާނަށް ވައިރޯޅި ގަދަޔަށްޖެހޭ ގޮތުގައި (އެ) ޚިދުމަތްތެރި ކުރެއްވީމެވެ. ތިމަންރަސްކަލާނގެ އެ ބިމުގައި، ބަރަކާތް ލެއްވި ބިމަށް، އެކަލޭގެފާނުގެ އަމުރުފުޅަށް، އެ ވައިރޯޅި ހިނގައިދާގޮތުގައެވެ. އަދި ތިމަންރަސްކަލާނގެ ކޮންމެކަމެއް ދެނެވޮޑިގެންވަމެވެ."" މަސްޖިދުލް އަޤުޞާ ގެ މާތްކަމަށް އަލިއަޅުވާލައި ޚުތުބާއި ބުނެފައިވެއެވެ. 

ޚުތުބާގައި ބުނީ، ގުދުސް އަކީ ސަލާމްލެއްވި އިބްރާހީމްގެފާނާއި އެކަލޭގެފާނުގެ ދަރިފަސްކޮޅުން ވަޑައިގެންނެވި ގިނަ ނަބިއްޔުންގެ ފަސްގަނޑު ކަމަށެވެ. އަދި އެއީ ސަލާމް ލެއްވު ދާވޫދުގެފާނާއި އެކަލޭގެފާނުގެ ދަރިކަލުން ސުލައިމާނު ޢަލައިހިއްސަލާމްގެ ބޮޑު ވެރިކަން ހިންގެވި މާތް ބިން ކަމަށްވެސް ޚުތުބާގައި ބުނެފައިވެއެވެ. 

"މިހެންކަމުން އެ ބިމަކީ ޔަހޫދީންގެ ނުވަތަ ޒަޔަނިސްޓުންގެ ތަނެއްގެ ގޮތުގައި ތާރީހީ ގޮތުން ވެސް އަދި ދީނީ ގޮތުންވެސް ކަނޑައެޅޭކަށް ނެތެވެ. އަލްމަސްޖިދުލް އަޤްސާއަކީ މުސްލިމުންގެ ހައްގެކެވެ،" ހުތުބާގައި ބުންޏެވެ.

ކަންމިހެން ހުރި ނަމަވެސް މިއަދު ގުދުސް އާއި މަސްޖިދުލް އަޤުޞާ ވަނީ ޒަޔަނިސްޓް ޔަހޫދީންގެ އިސްތިޢުމާރުގެ ދަށުގައި ކަމަށް ޚުތުބާގައި ފާހަގަކޮށްފައިވެއެވެ. 

މިއާއެކު ޚުތުބާގައި ވަނީ، މަސްޖިދުލް އަޤުޞާ އާއި، އެ ރަށާއި، އެ ރަށުގެ އަހުލުވެރިންނަށް ލިބެމުންދާ ގެއްލުންތަކުން އެ މިސްކިތާއި، އެ ބަރަކާތްތެރި ރަށާއި އެރަށުގެ އަހުލުވެރިން ޙމާޔަތް ކުރުމަށް ހުރިހާ މުސްލިމުންވެސް ގަދައަޅައި މަސައްކަތްކުރުމަށް ގޮވާލާަފައެވެ.