ދިވެހިން ތިބީ ފަލަސްޠީނާއި އެކުގައި ދައްކައިދިނުމަށް ބޭއްވި، އެތައް ހާސް ދިވެހިންނެއް ބައިވެރިވި ހިނގާލުމުގައި އިޒްރާއިލްގެ ޕާސްޕޯޓް ބޭން ކުރުމަށް ގޮވައިލައިފިއެވެ.

"ރައިޓް މޫވްމެންޓް" ގެފަރާތުން އިންތިޒާމްކުރި މި ހިނގާލުމުގައި އެތައް ހާސް ބަޔަކު ވަނީ ބައިވެރިވެފައެވެ.

ރޭ މާލެ މާފަންނު ރަސްފަންނު ސަރަހައްދުން ފެށުނު މި ހިނގާލުން ފެށުނިއްސުރެ ހިނގާލުމުގެ ބައިވެރިން ދިޔައީ ފަލަސްޠީން މިނިވަން ކުރުމަށް ގޮވައިލައި އަޑު އުފުލައިފައެވެ.

މި ހިނގާލުމުގައި ބައިވެރިވި ގިނަ ބަޔަކު ވަނީ އިޒްރާއިލް ބޮއިކޮޓް ކުރުމަށާއި އިޒްރާއިލްގެ ޕާސްޕޯޓް ބޭން ކުރުމަށް ގޮވައިލައިފިއެވެ.

ރަސްފަންނު ސަރަހައްދުން ފެށި ހިނގާލުން މަޖީދީ މަގުން ކުރިއަށްގޮސް ހުއްޓީ ހެންވޭރު ދަނޑަށެވެ. ހެންވޭރު ދަނޑުގައި ތިބެ ހިނގާލުމުގެ ބައިވެރިން ވަނީ ފަލަސްޠީނަށް ނަޞްރުދެއްވުން އެދި ދުޢާ ކޮށްފައެވެ.

ފަލަސްޠީނުގެ ޣައްޒާއަށާއި ހުޅަނގު އައްސޭރިއަށް އިޒްރާއިލްގެ ޔަހޫދީން ދަނީ ހުއްޓުމެއްނެތް ގޮތުގައި ނުރައްކައުތެރި ހަމަލާތައް ދެމުންނެވެ. އޮކްޓޫބަރު 7ވަނަ ދުވަހު އިޒްރާއިލްގެ ޔަހޫދީން ދޭން ފެށި ހަމަލާތަކުގެ ސަބަބުން ޝަހީދުވި މީހުންގެ ޢަދަދު 4000 މައްޗަށް އަރައިގެން ގޮސްފައިވާއިރު 1500 އެއްހާ ކުޑަކުދިން މީގެ ތެރޭގައި ހިމެނެއެވެ.