ފޯނެއް ފޭރިގަތް މައްސަލައިގައި ހައްޔަރުކުރި އުމުރުން 60 އަހަރުގެ މުހައްމަދު ވަހީދު ބަންދު މުއްދަތު ޖަހަން ކްރިމިނަލް ކޯޓަށް ގެންދިއުމުން ކުށަށް އިއުތިރާފުވެ އޭނާ ވީހާވެސް ގިނަ ދުވަހަށް ބަންދުގައި ބަހައްޓައިދިނުމަށް އަމިއްލައަށް އެދިއްޖެ އެވެ. 

މުހައްމަދު ވަހީދަކީ މަސްތުވާތަކެއްޗާއި ވައްކަމާއި ފޭރުމުގެ ކުށުގެ ރިކޯޑެއް އޮތް މީހެކެވެ. 

ފޯނު ފޭރިގަތް މައްސަލައިގައި ކޯޓަށް ހާޒިރުކުރުމުން އަމިއްލައަށް ކުށަށް އިއުތިރާފުވެ މުހައްމަދު ވަހީދު ބުނީ ފޯނު ފޭރިގަތީ މާލޭގައި ހުންނަ ކޮންމެވެސް ޕާކެއް ކައިރިން ކަމަށެވެ. އެކަން ކުރީ ފައިސާ ބޭނުންވާތީ ކަމަށާއި، އޭނާ އަކީ މަސްތުވާ އެއްޗިއްސަށް "ދެވިހިފާފައިވާ" މީހެއްކަމަށް އޭނާ ވަނީ ކޯޓުގައި ބުނެފަ އެވެ. 

Advertisement

އޭގެ އިތުރުން މަސްތުވާތަކެއްޗާއި ގުޅުންހުރި މައްސަލަތުގައި އޭނާ ޝާމިލުވާތީ އާއިލާއިން ވެސް އޭނާ އާއި ގުޅުން ބާއްވަން ބޭނުން ނުވާކަމަށް މުހައްމަދު ވަހީދު ބުންޏެވެ. އެކަންކަން ހާމަކޮށް އޭނާ ވަނީ ކޯޓުގައި ވީހާ ވެސް ގިނަ ދުވަހަކަށް އޭނާ ބަންދުކޮށްފައި ބެހެއްޓުމަށް އާދޭހާއެކު އެދިފައެވެ. 

ފުލުހުން ވަނީ އޭނާގެ މައްޗަށް ފޭރުމުގެ ތުހުމަތު ކުރެވޭ ކޮންމެވެސް މިންވަރެއްގެ ހެކި ހުށަހަޅާފަ އެވެ. މިއަހަރު އެކަނި ވެސް ހައްޔަރުގެ ބޮޑު ރެކޯޑެއް އޮތް ކަމަށް ކޯޓު އަމުރުގައި ފާހަގަ ކޮށްފައިވެ އެވެ.

ކްރިމިނަލް ކޯޓުން އޭނާގެ ބަންދަށް ވަނީ 30 ދުވަސް ދީފައެވެ. 

މި ފަހަކަށް އައިސް ފުރަމާލޭގެ މަގުތަކަކުގައި މަސްތުވާއެއްޗެހި ވިއްކުމާއި ވައްކަމާއި ފޭރުމުގެ ކުށްތައް އިތުރުވަމުންދާކަން ފާހަގަކޮށްލެވެއެވެ.

ފުލުހުން އާންމުކޮށްފައިވާ ތަފާސް ހިސާބުތަކަށް ބަލާލާއިރުވެސް އަހަރުން އަހަރަށް މިފަދަ ކުށްތައް އިތުރުވަމުން އަންނަކަން ފާހަގަކުރެވެއެވެ.