ފަލަސްޠީންގެ ޣައްޒާއާއި މިޞްރާއި ގުޅުވައިދޭ ރަފާހް ބޯޑަރު ހުރަސްކޮށް އެހީގެ ގާފިލާތައް ޣައްޒާއަށް އެތެރެއަށް ވައްދަން ފަށައިފިއެވެ.

އިންސާނީ ހައްޤުތަކަށް މަސައްކަތް ކުރާ ބައިނަލް އަޤްވާމީ ޖަމިއްޔާ އެއް ކަމަށްވަ ރެޑްކްރޮސެންޓުން ރަފާޙް މަގުން ޣައްޒާއަށް ވެއްދި އެހީގެ ގާފިލާގައި ހިމެނެނީ އެހީގެ ތަކެއްޗާއި އެކު ވާ 20 ޓްރަކެކެވެ.

ރަފާހް ބޯޑަރު ކައިރީގައި 200 އެއްހާ ޓްރަކް އެހީގެ ތަކެއްޗާއި އެކު ވަނީ ޖަމާވެފައެވެ. އެހުރިހާ އުޅަނދުތަކެއް އެތަނަށް ޖަމާވެފައި އެޮތް އިރު އިޒްރާއިލްގެ ޔަހޫދީން ޣައްޒާއަށް އެތެރެވުމަށް ހުއްދަދިނީ އެންމެ 20 ޓްރަކަކަށެވެ.

އެގާފިލާ ތަކުގައި ހިމެނެނީ ބޭހާއި، ބޭސްފަރުވާ ކުރުމަށް ބޭނުންކުރާނެ ވަސީލަތްތަކެވެ. އަދި ކޮންމެ ވެސް ވަރަކަށް ކާބޯތަކެތިވެސް ވަނީ ހިމަނައިފައެވެ.

ހޮސްޕިޓަލްތަކަށް ކަރަންޓު ދިނުމަަށް ތެލައް ބޭނުން ވެފައިމިވާ ދަނޑިވަޅުގައި އިޒްރާއިލުން ވަނީ އެހީގެ ގާފިލާތަކުގައި ތެޔޮ ހިމެނުން މަނާކޮށްފައެވެ.

ޒަޚަމްވީ މީހުންނަށް ފަރުވާދޭން ހުރި ގިނަ ހޮސްޕިޓަލްތައް ވަނީ ފުރިފައެވެ. ބައެއް ހޮސްޕިޓަލް ތަކުގައި ކަރަންޓެއް ނެތެވެ. ގިނަ ޢަދަދެއްގެ މެޑިކަލް ފެސިލިޓީތައް ހިންގޭނެ ގޮތް ނެތިގެން ބަންދުކޮށްފައިވެސް ވެއެވެ.

މިމަހުގެ 7ވަނަ ދުވަހު އިޒްރާއިލުން ޣައްޒާއަށް ހަމަލާދޭން ފެށިފަހުން ޝަހީދުވި މީހުންގެ ޢަދަދު 4000 މައްޗަށް ގޮސްފައިވާއިރު، ޒަޚަމްވި މީހުންގެ ޢަދަދު އެތައް ހާހަކަށް ވަނީ އަރައިގެން ގޮސްފައެވެ.