ފަލަސްޠީނުގެ ހުޅަނގު އައްސޭރީގައި އޮންނަ ޖެނީން ރެފިޔުޖީ ކޭމްޕްގައި ހުންނަ މިސްކިތަކަށް އަމާޒުކޮށް އިޒްރާއިލްގެ ޔަހޫދީން ހަމަލާދީފިއެވެ.

އަލް އަންޞާރް މިސްކިތައް އަމާޒުކޮށް ދިން ހަމަލާގައި ޝަހީދުވެފައިވަނީ ދެމީހެއް ކަމަށް އަލްޖަޒީރާގައި ބުނެފައިވެއެެވެ. އެމިސްކިތަށް އަމާޒުކޮށް ދިން ހަމަލާއަށްފަހު އިޒްރާއލްގެ ޔަހޫދީން ބުނެފައިވަނީ އެމިސްކިތަށް އަމާޒުކޮށްދިން ހަމަލާއަކީ އެމިސްކިތުގެ ދަށުގައި ހެދިފައިވާ ޓަނަލް ގައި ތިބި ހަނގުރާމެވެރިންނަށް އަމާޒުކޮށް ދިން ހަމަލާއެއްކަމަށެވެ.

ޖެނީން ރެފިޔުޖީ ކޭމްޕަށް އަމާޒުކޮށް ދިން ހަމަލާތަކުގެ ސަބަބުން އެތައް ބަޔަކު ޒަޚަމްވެ ފަރުވާ ދޭން ޖެހިފައިވާ ކަމަށް މެޑިކަލް އޮފިސަރުންނާއި ހަވާލާދީ އަލްޖަޒީރާގައި ބުނެފައިވެއެވެ.

މިސްކިތަށް ދިން ހަމަލާގެ އިތުރުން އިޒްރާއިލްގެ ޔަހޫީދީން ވަނީ ޣައްޒާގެ ރަފާހްގެ ޢާންމުން ދިރިއުޅޭ ގޭގެއަށް އަމާޒުކޮށް ހަމަލާތަކެއް ދީފައެވެ. މި ހަމަލާތަކުގެ ސަބަބުން އެތައް ކުޑަކުދިންނަކަށް ވަނީ އަނިޔާވެފައެެވެ. އޮކްޓޫބަރު 7 ވަނަ ދުވަހު ފެށި ހަމަލާތަކަށް މިއަދަށް 16 ދުވަސް ވީއިރު، މިއަދުގެ ހެނދުނަށް ވެސް ފަލަސްޠީނުގެ ރައްޔިތުން މަރުޙަބާ ކިޔައިފައިވަނީ ގިނަ ޢަދަދެއްގެ ޝަހީދުންގެ ހަށިތަކާއި އެކުއެވެ.

ހަމަލާތަކަށް 16 ދުވަސް ވެފައިވާއިރު ޝަހީދުވި މީހުންގެ ޢަދަދު 4000 މައްޗަށް އަރައިގެން ވަނީ ގޮސްފައެވެ. އެކިވަރުގެ އެކި ޒަޚަމްތައް ލިބުނު މީހުންގެ ޢަދަދު 15000 އަށް އެރުމާއި ވަނީ ގާތްވެފައެވެ.