އިޒްރާއިލުން ހުއްޓުމެއްނެތި ފަލަަސްޠީނަށް ދެމުންދާ ހަމަލާތަކުގައި ޣައްޒާގައި އޮންނަ ޖަބަލިޔާ ރެފިޔުޖީ ކޭމްޕަށް ހަމަލާއެއްދީ 30 މީހުން ޝަހީދު ކޮށްލައިފިއެވެ.

ހަމަލާއަމާޒުވެގެން ހަލާކުވި އިމާރާތުގެ ދަށުން މަރުވެފައިވާ 30 މީހެއްގެ ހަށިގަނޑު ނެގިފައިވާ ކަމަށާއި އޭގެ ތެރޭެގައި ގިނައީ އަންހެނުންނާއި ކުޑަކުދިން ކަމަށް ފަަލސްޠީނުގެ ސިވިލް ޑިފެންސުން ބުނެފައިވެއެވެ.

ފަލަސްޠީނުގެ ޚާރީޖީ ވުޒާރާއިން ބުނެފައިވަނީ އޮކްޓޫބަރު 7ގެ ހަމަލާތައް ފެށުނު ފަހުން ޣައްޒާގައި އޮންނަ އެންމެ ބޮޑު އަށް ރެފިޔުޖީ ކޭމްޕްގައި ހުންނަ މީހުން ދިރިއުޅޭ ޢިމާރާތްތަކަށް އިޒްރާއިލްގެ ޔަހޫދީން ބޮންއަޅައި ފައި ވާ ކަމަށެވެ.

ޖަބަލިޔާ އަށް ދިން ހަމަލާގައި 27 މީހަކު ވަނީ ޒަޚަމްވެ ފަރުވާއަށް ހޮސްޕިޓަލުގައި އެޑްމިޓް ކޮށްފައި ކަމަށް އަލްޖަޒީރާގައި ބުނެފައިވެއެވެ.

ޒަޚަމްވެގެން ފަރުވާ ދޭން ޖެހޭ މީހުންގެ ޢަދަދު ކޮންމެ ދުވަހަކު މަތިވަމުން އަންނަ އިރު ހޮސްޕިޓަލު ތައް ދަނީ މީހުންނަށް ފަރުވާ ދިނުމަށް ދަތިވާ ދަރަޖައަށް ވެއްޓެމުންނެވެ.

ޣައްޒާގެ އިންދޮނީސީ ހޮސްޕިޓަލުން ބުނެފައިވަނީ އެހޮސްޕިޓަލުން ވަނީ ބޭހާއި ބޭސްވެރިކަމަށް ބޭނުންވާ ތަކެއްޗަށް އިންތިހާއަށް ޖެހިފައިކަމަށެވެ.

ފަލަސްޠީނުގެ މިނިވަން ކަމަށްޓަކައި ހަނގުރާމަ ކުރާ ޖަމާޢަތަކުން އޮކްޓޫބަރު 7ވަނަ އަށްވީ ދުވަހު އިޒްރާއިލުން ފަލަސްޠީނުގެ ބިމުން ގަދަކަމުން ފޭރިގަނެފައިވާ ސަރަހައްދަށް ދިން ހަމަލާތަކެއްގެ ރައްދެއް ކަމަށް ބުނެ ފަަލަސްޠީނުގެ ރައްޔިތުންނަށް އިޒްރާއިލުން ހަމަލާދޭތާ 17 ދުވަސް ވަނީ ވެފައެވެ.

އިޒްރާއިލްގެ ހަމަލާތަކުގައި ޝަހީދުވި ފަލަސްޠީނުގެ މީހުންގެ ޢަދަދު 5000 އަށް އެރުމާއި ގާތްވެފައިވާއިރު ޒަޚަމްވި މީހުންގެ ޢަދަދު ގާތްގަނޑަކަށް 15000 ވަނީ އަރައިފައެވެ.

ޝަހީދުންނާއި ޒަޚަމްވި މީހުންގެ ތެރޭގައި އެންމެ ބޮޑު ޢަދަދެއް ޚިއްސާ ކުރަނީ ކުޑަކުދިންނެވެ.