ޖަރުމަނުގެ މަގުތަކުގައި ފަލަސްޠީނާއި އެކުގައި ތިބިކަން ދައްކުވައިދީ ފަލަސްޠީނުގެ މިނިވަން ކަމަށް ގޮވަލައި އިޙްތިޖާޖް ކުރި ބަޔަކަށް ޖަރުމަނުގެ ފުލުހުން އަނިޔާކޮށްފިއެވެ.

އިޙްތިޖާޖަށް ނުކުމެ އުޅުނު މީހުންގެ ގައިގައި ޖަރުމަނު ޕޮލިހުން ވަނީ ކޮޅުފައިން ޖަހައި ގިނަ ބަޔަކަށް އަނިޔާ ކޮށްފައެވެ. އަދި މި އިޙްތިޖާޖްގައި ބައިވެެރިވި ގިނަ ބަޔަކު ވަނީ ހައްޔަރުވެސް ކޮށްފައެވެ.

ޖަރުމަނުގެ ބޮޑެތި މަގުތަކުގައި ބޭއްވުނު މި އިޙްތިޖާޖްގައި 7000 އެއްހާ މީހުން ވަނީ ބައިވެރިވެފައެވެ.

Advertisement

ޖަރުމަނަކީ ފާޅުގައި އިޒްރާއިލަށް ތާއިދު ކުރާ ކަން އިޢްލާނު ކޮށްފައިވާ ޤައުމުކެވެ.

ޖަރުމަނުގެ އިތުރުން އިންގިރޭސިވިލާތް، އެމެރިކާ ފަދަ ޤައުމުތަކުގައި ވެސް އަންނަނީ އިޒްރާއިލުން ހިންގަމުންދާ އިންސާނިއްޔަތާއި ޚިލާފް ޢަމަލުތަކާއި ދެކޮޅަށް އަޑު އުފުލަމުންނެވެ.

ސްވިޑިންގެ ސްޓޮކްހަމްގެ ބޮޑެތި މަގުތަކަށް ގިނަ ބަޔަކު ނުކުމެ ވަނީ ފަލަސްޠީނުގައި ހިންގާ އަނިޔާވެރި ޢަމަލުތައް ހުއްޓައިލުމަށް އަޑުއުފުލާފައެވެ.

ފަލަސްޠީނުގެ ރައްޔިތުންގެ ހައްޤުތަކަށް ގޮވައި އިޙްތިޖާޖް ކުރަމުންދަނީ ހަމައެކަނި ޢަރަބި އިސްލާމީ ޤައުމުތަކުގެ ރައްޔިތުން އެކަންޏެއް ނޫނެވެ.

ޔޫރަޕްގެ ބައެއް ޤައުމުތަކުގެ ރައްޔިތުންވެސް ދަނީ ފާޅުކަން ބޮޑު ގޮތެއްގައި އިޒްރާއިލާއި ދެކޮޅަށް އަޑުއުފުލަމުންނެވެ.