އިނގިރޭސިވިލާތުގެ "ވާޖިން އެޓްލާންޓިކް" ގެ އުދުހުންތައް މިއަދު ރާއްޖެއަށް ފަށައިފި އެވެ. 

އިނގިރޭސި ބިލިއަނަރު ރިޗަޑް ބްރޭންސަންގެ މި އެއާލައިންގެ ދަތުރުތައް ރާއްޖެއަށް ފެށުމާއި ގުޅޭގޮތުން، އެމްއޭސީއެލް އިން މިކަމާއި ގުޅިގެން ނެރުނު ނޫސްބަޔާނެއްގައި ބުނީ، ވާޖިން އެއާލައިންއިން މިއަދުން ފެށިގެން ހަފުތާއަކު ތިން ފްލައިޓް ރާއްޖެއަށް ބާއްވައި ދޭނެ އެވެ. 

މިއަދު އޮތް އެ އެއާލައިންގެ ފުރަތަަމަ ފްލައިޓް ރާއްޖެ އައިސްފައި ވަނީ އިނގިރޭސި ވިލާތުގެ ހީތްރޯ އެއާޕޯޓުން 200 އަށްވުރެ ގިނަ ފަތުރުވެރިންނާއި އެކު މިއަދު ހެނދުނުގެ 7:40 ކަންހާއިރުގައެވެ.  

Advertisement

މިކަމާއި ގުޅިގެން އެމްއޭސީއެލްގެ ސީއީއޯ މަހުޖޫބު ޝުޖާއު ވިދާޅުވީ، މިއީ އިނގިރޭސިވިލާތާއި ރާއްޖެއާއި ދެމެދުގެ ވައިގެ ދަތުރުތަކަށް ލިބުނު ފާހަގަކޮށްލަންޖެހޭ ވަރުގެ ބޮޑު ކުރިއެރުމެއް ކަމަށެވެ. އަދި، ވާޖިން އެއާލައިންއާއި އެކު ވެވުނު ޕާޓްނާޝިޕް ގެ ދަށުން ފަސިންޖަރުންނަށް ހިތްހަމަޖެހޭ ދަތުރުތަކެއް ކުރުމުގެ މަގު ފަހިވެގެންދާނެ ކަމަށްވެސް މަހުޖޫބު ވިދާޅުވި އެވެ. 

އިނގިރޭސި ވިލާތުގެ ހީތްރޯ އިން ރާއްޖެއަށް މިފެށުނު ދަތުރު ތަކާއި ގުޅިގެން، އިނގިރޭސިވިލާތުން ދިވެހިރާއްޖެއަށް ކަނޑައަޅުއްވާފައިވާ ސަފީރު ކެރޮން ރޮސްލާ ވަނީ، އެ ގައުމުގެ ފަތުރުވެރިންނަށް އެންމެ ކަމުދާ އެއް މަންޒިލަކީ ދިވެހިރާއްޖެކަން ފާހަގަކުރައްވާފައެވެ. އަދި ދިވެހިރާއްޖެއަށް ތިންވަނަ އަށް އެންމެ ގިނަ ފަތުރުވެރިން ޒިޔާރަތްކުރާ ގައުމަކީ ވެސް އިނގިރޭސި ވިލާތް ކަން ފާހަގަކުރައްވައި ކެރޮން އިތުރަށް ވިދާޅުވީ، މިއަދު ފެށުނު ދަތުރު ތަކާއި އެކު ރާއްޖޭގެ އިގްތިސާދަށް ފައިދާގެ، ދެގައުމުގެ ދެމެދުގައި ދަތުރު ފަތުރުކުރަންވެސް ފަސޭހަވެގެންދާނެ ކަމަށެވެ. 

ވާޖިން އެޓްލާންޓިކްގެ ފެށި މި ދަތުރުތަކުގައި އެ އެއާލައިނުން ބޭނުން ކުރާނީ ބޯއިން 787 މަރުކާގެ ބޯޓެވެ. އެ ބޯޓުގައި އަޕާ ކްލާސްގެ 31 ސީޓާއި ޕްރީމިއަމް ކްލާސްގެ 35 ސީޓާއި އިކޮނޮމީ ކްލާސްގެ 192 ސީޓު ހުރެއެވެ. ވާޖިން އެޓްލާޓިކްގެ އަޕާ ކްލާސްގައި ދަތުރު ކުރާ ފަރާތްތަކަށް އޮށޯވެ އޮތުމަށް އެނދެއް ލިބޭ އިރު، އޮންބޯޑް ބާއެއްގެ އިތުރުން އިށީނުމަށް ލަގްޒަރީ ގޮނޑި ވެސް ލިބޭނެއެވެ.

އިނގިރޭސި މާކެޓަކީ ރާއްޖެއަށް އެންމެ މުހިންމު އެއް މާކެޓެވެ. އަދި މިއީ އެންމެގިނަ ރިޕީޓާސް އަންނަ މާކެޓެވެ. މި މާކެޓުން މިހާތަނަށް 115,300 ޓޫރިސްޓުން އައިސްފަައި ވެއެވެ.