ސްޓޭޓް އިލެކްޓްރޯނިކް ކޮމްޕެނީ އިން،، ފަލަސްޠީންގެ ޣައްޒާއަށް އެހީވުމަށް އިންޓަރނޭޝަލް އެއިޑް ކެމްޕޭނުން ހުޅުވާލައިފައިވާ ފަންޑަށް ފަސް ލައްކަ ރުފިޔާ ހަދިޔާ ކޮށްފިއެވެ.

ސްޓެލްކޯއިން ބުނެފައިވަނީ އިޒްރޭލުގެ ހައްދުފަހަނައެޅި އަސްކަރިއްޔާ އިން ދެމުންގެންދާ ހަމަލާތަކުގައި ހާލުގައި ޖެހިފައިވާ ފަލަސްތީނުގެ ރައްޔިތުންނަށް އެހީވުމަށްޓަކައި، އެކުންފުނީގެ ސީއެސްއާރުގެ ދަށުން 500،000.00 (ފަސްލައްކަ ރުފިޔާ) ވަނީ "އަހަރުމެން ފަލަސްޠީނާއެކު ފަންޑަށް" ހަދިޔާ ކުރެވިފައި ކަމަށެވެ.

މި ފައިސާ އިންޓަރނޭޝަނަލް އެއިޑް ކެމްޕެއިނާއި ހަވާލުކޮށްފައިވަނީ މިއަދު ސްޓެލްކޯ ބޯޑު ރޯމްގައި ބޭއްވި ރަސްމިއްޔާތެއްގައެވެ. ސްޓެލްކޯގެ ފަރާތުން މި ފައިސާގެ އެހީގެ ޗެކް އިންޓަރނޭޝަނަލް އެއިޑް ކެމްޕެއިނާއި ހަވާލުކޮށްދެއްވީ މެނޭޖިންގ ޑިރެކްޓަރ އަހުމަދު ޝަރީފެވެ. އިންޓަރނޭޝަނަލް އެއިޑް ކެމްޕެއިންގެ ފަރާތުން ޗެކާ ހަވާލުވެލެއްވީ އިންޓަރނޭޝަނަލް އެއިޑް ކެމްޕެއިންގެ ޗެއާމަން އަހުމަދު އިޤްބާލެެވެ.

ފަލަސްޠީނުގެ ރައްޔިތުންނަށް އެހީވުމަށް އިންޓަރނޭޝަނަލް އެއިޑް ކެމްޕެއިންއިންގެ ފަރާތުން ކުރިއަށް ގެންދާ ފަންޑު ހޯދުމުގެ ހަރަކާތްތަކަށް އެހީތެރިވެދިނުމުގެ ގޮތުން އެކުންފުނީގެ ހެޑް އޮފީހުގެ ލޮބީ ސަރަހައްދުގައި ވަނީ ފަންޑުފޮއްޓެއް ބެހެއްޓިފައި ކަމަށް އެކުންފުނިން ބުނެފައިވެއެވެ.

އައިއޭސީ އިން ފަލަސްޠީނަށް އެހީވުމަށް ހުޅުވާލެވިފައިވާ ފަންޑަށް ދިވެހިންގެ ގިނަ ބަޔަކު އަންނަނީ ފައިސާ ޖަމާކުރަމުންނެވެ.