20 ވަނަ ރައްޔިތުންގެ މަޖިލީހުގެ އިންތިޚާބުގައި ދާއިރާތައް ކަނޑައަޅާފައިވާ ގޮތާއި ގުޅިގެން 65 ޝަކުވާއެއް ހުށައަޅާފައިވާކަން އިލެކްޝަންސް ކޮމިޝަނުން ހާމަކޮށްފި އެވެ.

މަޖިލީހުގެ އިންތިޚާބީ ދާއިރާތައް ކަނޑައަޅާފައިވާ ގޮތާއި ގުޅިގެން 65 ޝަކުވާ ހުށައަޅާފައިވާއިރު ގިނަ ޝަކުވާތައް ލިބިފައިވަނީ އައްޑޫ ފޭދޫ އުތުރު ދާއިރާއާ ގުޅޭ ޝަކުވާތައްކަމަށް އީސީން ވަނީ ބުނެފައެވެ. އެގޮތުން އެ ދާއިރާއާއި ގުޅިގެން 44 ޝަކުވާ ހުށައަޅާފައިވާކަމަށް އީސީން ވަނީ ބުނެފައެވެ.

އައްޑޫ ފޭދޫ ދާއިރާގެ އިތުރުން މާލޭގެ ބައެއް ދާއިރާތަކާއި، އަތޮޅުތެރޭގެ ބައެއް ދާއިރާތަކާއި ގުޅޭ ޝަކުވާތައް ވެސް ލިބިފައިވާކަމަށް އިލެކްޝަންސް ކޮމިޝަނުން ވަނީ ބުނެފައެވެ. އަދި މި ޝަކުވާތަކަށް ބެލުމަށްފަހު އަންނަ އަހަރުގެ ރައްޔިތުންގެ މަޖިލީހުގެ އިންތިޚާބީ ދާއިރާތަކުގެ ދާއިމީ ލިސްޓު އަންނަ މަހުގެ 5 ގެ ކުރިން އެކުލަވާލާނެކަމަށް އީސީން ވަނީ ބުނެފަ އެވެ.

Advertisement

ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމުގައި ބަލަމުން އަންނަ އުސޫލަކީ ކޮންމެ 5،000 މީހުންގެ އާބާދީއަކީ ވަކި ދާއިރާއެއްގެ ގޮތުގައި ކަނޑައެޅުމެވެ.

ޤާނޫނު އަސާސީއާއި ޤާނޫނުގައި ބުނެފައިވާ ގޮތުގެ މަތިން އާބާދީއަށް ބަލައިގެން ކޮންމެ މަޖިލިސް އިންތިޚާބަކަށް ދާއިރާތައް އަންނަނީ އިތުރުވަމުންނެވެ.

އެގޮތުން މިހާރު މަޖިލީހުގައި ތިއްބެވި 87 މެންބަރުންގެ ބަދަލުގައި އަންނަ މަޖިލީހުގައި 93 މެންބަރުން ތިއްބަވާނެއެވެ.