ދިވެހިރާއްޖޭގައި ރިއަލް އެސްޓޭޓު ނަމުގައި ގާނޫނެއް އަދި އަދަށްވެސް ނެތް ކަމަށާ އެފަދަ ގާނޫނެއް އެކުލަވާލަން ޖެހޭ ކަމަށް މާފަންނު މެދު ދާއިރާގެ މެންބަރު އިބްރާހީމް ރަޝީދު ވިދާޅުވެއްޖެއެވެ. 

ބޮންޑެ މިހެން ވިދާޅުވެފައި ވަނީ ސަރުކާރުގެ ފަރާތުން ކެނދިކުޅުދޫ ދާއިރާގެ މެންބަރު އަޙްމަދު ޢީސާ ހުށަހަޅުއްވާފައިވާ، ދިވެހިރާއްޖޭގެ ޓޫރިޒަމާ ބެހޭ ޤާނޫނަށް އިޞްލާޙު ގެނައުމުގެ ބިލަށް ބަހުސްކުރައްވަމުން ބޮންޑެ ވިދާޅުވީ ފަތުރުވެރިކަމަކީ ރިއަލް އެސްޓޭޓުގެ ވިޔަފާރިއެއް ކަމަށެވެ. 

"އިމާރާތް ކުރުން. އިމާރާތުގެ ކޮޓަރި އެޅުމާ، އިމާރާތުގެ މަސައްކަތެއް މިކުރަނީ. ކޮންސްޓްރަކްޝަންގެ މަސައްކަތެއް ކުރަނީ ފުރަތަމަ." ބޮންޑެ ވިދާޅުވިއެވެ. 

ބޮންޑެ ވިދާޅުވީ ޓުއަރިޒަމް ރިއަލް އެސްޓޭޓު ގާނޫނެއް ހެދޭއިރު، ރާއްޖޭގައި މިހާތަނަށްވެސް ރިއަލް އެސްޓޭޓު ގާނޫނެއް ނެތް ކަމަށެވެ. އަދި ރިއަލް އެސްޓޭޓު ގާނޫނެއް ނެތި ފަތުރުވެރިކަމަށް ރިސޯޓްތައް ފަދަ ތަންތަން ތަރައްގީ ކުރުމަށް އިންވެސްޓަރުންނަށް ހުޅުވާލުމުން އެ މަސައްކަތް ދަނީ ހަގީގަތުގައި ދާންޖެހޭ މަގުން ނޫން ކަމަށެވެ. 

ބޮންޑެ ވިދާޅުވީ، ކުރީގެ ރައީސް، ޔާމީން އަބްދުލްގައްޔޫމްގެ ވެރިކަން ނިމެން ކައިރިވެފައި ވަނިކޮށް، ރިއަލް އެސްޓޭޓު ގާނޫނާ ގުޅޭ ބިލެއް ފަރުމާ ކޮށްގެން ގެންގުޅުނު ކަމަށެވެ. އެހެން ނަމަވެސް އެ ބިލު ވަކި ހިސާބަކުން "ގެއްލުނު" ކަމަށާ އެފަދަ ގާނޫނެއް އަދި އަދަށްވެސް ވުޖޫދުގައި ނެތް ކަމަށް އޭނާ ވިދާޅުވި އެވެ. އަދި ރިއަލް އެސްޓޭޓު ގާނޫނެއް ނެތި، ޓޫރިޒަމް އާ ބެހޭ ގާނޫނަށް ގެންނަން ހުށަހަޅާފައިވާ އިސްލާހުތައް ގެނެސްފިނަމަ ކަންކަން ބޮއްސުންލައިގެން ދާނެ ކަމަށް ބޮންޑެ ވިދާޅުވިއެވެ. 

ސަރުކާރުގެ ފަރާތުން އީސަ ހުށަހެޅި އިސްލާހުގައި ވަނީ ޗާޓަރު އުސޫލުން އެނދު ކުއްޔަށް ދޭއިރު ނަގައި ޖީއެސްޓީ ނިމުމަކަށް ގެނެސް، އޭގެ ބަދަލުގައި ފަތުރުވެރިކަމުގެ ރިއަލްއެސްޓޭޓު ޓެކުހެއް ތައާރަފުކުރާށެވެ.