ފަލަސްޠީނުގެ ޣައްޒާގައި ރައްކާތެރި އެއްވެސްް ތަނެއް ނެތް ކަމަށް ޣައްޒާގައި ހަރަކާތްތެރިވާ ޔޫއެންގެ އެޖެންސީ އިން ބުނެފިއެެވެ.

އަލްޖަޒީރާގައި ޔޫއެންގެ އެޖެންސީއަށް ހަވާލާދީ ބުނެފައިވަނީ 600،000 ގެދޮރުގެއްލިފައިވާ މީހުން ޔޫއެންގެ 150 ވަގުތީ ހިޔަލެއްގައި ބޯހިޔާވަހިކަން ހޯދަމުން ދާ ކަމަށެވެ.

“އަހަރެމެންގެ ފެސިލިޓީތަކުގައި އަސްލު ތިބެވޭނެ މިންވަރުގެ 4 ގުަނަ އިތުރު މީހުން އެބަތިބި، އަހަރެމެން ތައްޔާރުކޮށްފައިވާ ފެސިލިޓީތައް ފުރި ބާރުވެގެން، ގިނަ ބަޔަކު ނިދަމުންދަނި މަގުތައް މަތީގައި” ޔޫއެންގެ އެޖެންސީ އިން ބުނެފައިވެއެވެ.

ފަލަސްޠީނުގެ ހެލްތް މިނިސްޓްރީ އިން ބުނެފައިވަނީ ޒަޚަމްވެފައިވާ 7000 މީހަކު ދަނީ ހޮސްޕިޓަލްތަކުގައި މަރާ ހަނގުރާމަ ކުރަމުންދާކަމަށެވެ.

އަދި ޣައްޒާގެ ހޮސްޕިޓަލްތައް ޙާލުގައި ޖެހިފައިވާ މީހުން ބޭނުންކުރާ ވަގުތީ ހިޔާތަކަކަށް ވެފައިވާ ކަމަށެވެ. ޑޮކްޓަރުންނާއި މެޑިކަލް އޮފިޝަލުން އެދެމުންދަނީ “މެޑިކަލް އެއިޑް” އާއި ތެޔޮ ފޯރުކޮށްދިނުމަށް ކަމަށެވެ.

ޣައްޒާގެ ހޮސްޕިޓަލްތައް ހުރީ ހުޅުވައިފައި ކަމަށާއި، ނަމަވެސް ޚިދްމަތް ބޭނުންކުރާ ތަކެއްޗާއި ޖާގަ ނެތުމުގެ ސަބަބުން މިހާރު ވަނީ ޚިދްމަތް ދިނުމަށް ނުކުޅެދިފައި ކަމަށް ފަަލަސްޠީނުގެ ހެލްތް މިނިސްޓްރީއާއި ހަވާލާދީ އަލްޖަޒީރާގައި ބުނެފައިވެއެވެ.