ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރުނެތްކަމަށް ފާސްކުރުމަށް މަޖިލީހުގެ މެޖޯރިޓީ ޕާޓީ، އެމްޑީޕީން ތްރީލައިން ވިޕެއް ނެރެފިއެވެ. 

މިކަން ހާމަކުރައްވައި އިހަވަންދޫ ދާއިރާގެ މެންބަރު މުހައްމަދު ޝިފާއު ވިދާޅުވީ، މިއަދު ބޭއްްވުނު އެމްޑީޕީ ޕާލަމަންޓްރީ ގްރޫޕްގެ ބައްދަލުވުމުގައި ބައިވެރިވި ހުރިހާ މެމްބަރުންގެ އިއްތިފާގުން ރައީސް ނަޝީދު މަޖިލީހުގެ ރައީސްގެ މަގާމުން ދުރުކުރުމަށް ތްރީބލައިން ވިޕް އެއް ފާސްކޮށްފައިވާ ކަމަށެވެ. 

އަދި ޤާނޫނު އަސާސީއާއި މަޖިލީހުގެ ގަވާއިދާއި އެއްގޮތްވާގޮތުގެ މަތިން ރައްޔިތުންގެ މަޖިލީހުގެ އެއްވެސް މަސައްކަތެއްް ދެންކުރެވޭނީވެސް ރައްޔިތުންގެ މަޖިލީހީހުގެ ރައީސް އިތުބާރުނެތްކަމުގެ މައްސަލައަށް ގޮތެއްނިންމުމަށްފަހު ކަމުގައިވެސް އެޕާޓީގެ މެމްބަރުން އިއްތިފާގުވެފައިވާ ކަމަށް ޝިފާއު ވިދާޅުވި އެވެ. 

Advertisement

ޝިފާއު އިތުރަށް ވިދާޅުވީ، 29ސެޕްޓެމްބަރ (އާދިއްތަ) ދުވަހު މަޖިލީހުގައި ބޭއްވުމަށް އެޖެންޑާ ކޮށްފައިވާ މަޖިލީހުގެ ރައީސްގެ އިތުބާރުނެތްކަމުގެ މައްސަލަ ހިގަމުންދާ ވަގުތުގައި އެމްޑީޕީީގެ ގެ އާއްމު މެންބަރުން މަޖިލީހަށް ހާޒިރުވުމަށް އެ ޕާޓީގެ ޕީޖީގެ މެމްބަރުން އެދޭ ކަމަށާ މަޖިލީހުގެ ގެލެރީ އާއްމުންނަށް ހުޅުވިފައިވާ ކަމަށެވެ. 

"މިގައުމުގެ ޑިމޮކުރަސީގެ ހައްގުގައި ކުރަންޖެހުނު ކޮންމެ ކަމެއް ކުރުމަށްވަނީ ‎އެމްޑީޕީގެ ޕީޖީ އިން އިއްތިފާޤުވެފައި." ޝިފާއު ވިދާޅުވި އެވެ. 

ނަޝީދުގެ އިތުބާރު ނެތް ކަމުގެ މައްސަލަ މަޖިލީހަށް ހުށަހަޅަން އެމްޑީޕީގެ ޕާލިމަންޓް ގުރޫޕުން ފާސްކޮށް މަޖިލީހަށް ހުށައެޅީ 48 މެންބަރުންގެ ސޮޔާއިއެކުއެވެ.

ރައީސް ނަޝީދުގެ އިތުބާރު ނެތްކަމަށް ނިންމި ސަބަބުތަކުގެ ތެރޭގައި، މަޖިލީހުގެ އެޖެންޑާ ކަނޑައެޅުމާއި މަޖިލީހުގެ ތަޅުމަށް ކަންކަން ގެނައުމުގައި ރައީސް ނަޝީދުގެ އަމިއްލަ މަސްލަހަތު އިސްކޮށް ވަކި ފަރާތަކަށް ބުރަވެ، މަޖިލީހުގެ ގަވާއިދާ ހިލާފަށް ކަންކަން ނިންމަމުންދާކަމަށް ޕާލަމެންޓްރީ ގްރޫޕުން ފާހަގަކޮށްފައިވެއެވެ.

އަދި މަޖިލީހުގެ ޖަލްސާތައް އެތައް ދުވަހެއް ވަންދެން ރައީސް ނަޝީދު ހުއްޓުވިކަމަށާއި، އަލުން ޖަލްސާތައް ފެށީ ރައީސް ނަޝީދު ނިސްބަތްވެވަޑައިގަންނަވާ ޕާޓީ ދަ ޑިމޮކްރެޓްސް އަދި އެމަނިކުފާނު މަސްލަހަތު އޮތް މައްސަލަތަކެއް މަޖިލީހަށް ތާވަލު ކުރުމަށް ފަހުކަމަށްވެސް ބުނެފައިވާއިރު އިސްލާހުގެ ނަމުގައި މަގާމުގެ ދަހިވެތިކަން އިސްކޮށް އެމަނިކުފާނު އެމްޑީޕީއަށް ގެއްލުން ދެމުންދާ ކަމަށްވެސް ތުހުމަތު ކޮށްފައި ވެއެވެ.