ފަލަސްޠީނުގެ ޣައްޒާއަށް އޮކްޓޫބަރު 13 ވަނަ ދުވަހު އިޒްރާއިލްގެ ޔަހޫދީން ދިން ހަމަލާތަކުގައި ބޮޑެތި ޒަޚަމްތަކެއް ލިބި ޝަހީދުވި މާބަނޑު އަންހެނެއް ކަމަށްވާ މަރްޔަމްގެ ދަރިފުޅު ޣައްޒާގެ އަލް ޝިފާ ހޮސްޕިޓަލުގައި ފަރުވާ ހޯދަމުން އެބަގެންދެއެވެ.
“އިބްނު މަރްޔަމް އަލް ޙަރްޝް” ދުނިޔެއަށް އުފަންވެފައިވަނީ ބަނޑަށް އެންމެ 32 ހަފްތާގައި، އޭނާގެ މަންމަ މިދުނިޔެއަށް އަލްވަދާޢު ކީފަހުންނެވެ. ލިބުނު ޒަޚަމްތަކަށް ފަރުވާ ހޯދަމުން ދަނިކޮށް މަރްޔަމް ވަނީ ޝަހީދުވެފައެވެ.
އަލް ޝިފާ ހޮސްޕިޓަލްގެ ޑޮކްޓަރ ނައްސިރް ބުލްބުލް އިބްނު މަރްޔަމް އަލް ޚަރްޝް ދުނިޔެއަށް އުފަންވުން ސިފަ ކުރައްވައިފައިވަނީ އިޒްރާއިލްގެ ޔަހޫދީންނާއި ދެކޮޅަށް ލިބުނު ނަޞްރެއްގެ ގޮތުގައެވެ.
“އޮކްޓޫބަރ 13 ވަނަ ދުވަހު ކަމާލް އަދްވަން ހޮސްޕިޓަލުން އަހަރެމެންނަށް ލިބުނީ ކޯލެއް، ވަރަށް ބޮޑަށް ޒަޚަމްތައް ލިބިފައި އޮތް މާބަނޑު އަންހެނެއް މަރުގެ ތުންފަތް މަތީގައި އޮތް ކަމަށް ބުނީ” ޑޮކްޓަރ ބުލްބުލް އަލްޖަޒީރާ އަށް ބުނެފައިވެއެވެ.
މަރްޔަމްގެ އާއިލީ ގެއަށް ދިން ރޮކެޓް ހަމަލާތަކުގައި އެ ގެވަނީ ހަލާކުވެފައި ކަމަށާއި އެ އާއިލާގެ 10 މެމްބަރުން އެއްކޮށް އެހަމަލާގައި ޝަހީދުވެފައިވާ ކަމަށް ޑރ ބުލްބުލް ވިދާޅުވެފައިވެއެވެ.
އަލްޖަޒީރާގައި ޑރ ބުލްބުލް އަށް ހަވާލާދީ ބުނެފައިވަނީ މަރްޔަމް ޝަހީދުވުމުން ދަރިފުޅު ސަލާމަތް ކުރެވޭނެ ކަމުގެ އުންމީދު އޮތުމުން އެމަޖެންސީގައި ސީސެކްޝަން ހަދައި ދަރިފުޅު ނަގައިފައިވާ ކަމަށެވެ. ނެގިއިރު އެކުއްޖާ މަރުނުވާ ކަމަށާއި ނަމަވެސް ހިތުގެ ވިންދުން ވަރަށް ބޮޑަށް ދަށްވެފައި ވާކަމަށެވެ.
ވަގުތުން އެމަޖެންސީކޮށް އިބްނު މަރްޔަމް އަލް ޝިފާ ހޮސްޕިޓަލަށް ގެނެވިފައިވާ ކަމަށެވެ. އަދި އަލް ޝިފާގެ އެންއައިސީޔޫގައި މެޝިނުގައި ފަރުވާ ހޯދަމުން ދާކަމަށެވެ. އަލް ޝިފާގެ އެންއައިސީޔޫގައި މިހާރުވެސް 54 ކުއްޖަކު ދަނީ ފަރުވާ ހޯދަމުންނެވެ.
ޑރ ބުލްބުލް ވިދާޅުވެފައިވަނީ އިބްނު މަރްޔަމްގެ ޙާލު އަންނަނީ ދުވަހެއް ދުވަހަަކަށް ރަނގަޅުވަމުން އަންނަކަމަށެވެ. އަދި އެކުއްޖާގެ ޙާލު ބަލައިލުމަށް ނުވަތަ ހޯދުމަށްވެސް އޭނާގެ ޢާއިލާގެ އެއްވެސް މީހަކު އައިސްފައި ނުވާ ކަަމަށް ޑރ ބުލްބުލް އާއި ހަވާލާދީ އަލްޖަޒީރާ ގައި ބުނެފައިވެއެވެ.
Advertisement
This content is created and paid for by advertisers and does not involve Voice Journalists
