ރައްޔިތުންގެ މަޖިލީހުގެ ރައީސް މުހައްމަދު ނަޝީދު ރިޔާސަތު ބަލަހައްޓަވާ ދަރުބާރެއްގައި ޑރ މުހައްމަދު މުއިއްޒު ހުވާކުރައްވައިފިނަމަ ރައީސް މުއިއްޒަކީ ގާނޫނާއި އެއްގޮތްވާ ގޮތުގެ މަތީން ހުވާ ކުރައްވައިގެން ހުންނެވި ރައީސެއް ކަމުގައި ބަލައި ނުގަންނާނެ ކަމަށާއި އެމަނިކުފާނުގެ ކެބިނެޓަކަށް ރުހުން ނުދޭނެ ކަމުގައި އެމްޑީޕީގެ ޕާލަމެންޓްރީ ގްރޫޕުން ބުނެފިއެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ދުރުކުރަން އެމްޑީޕީގެ ޕާލިމަންޓަރީ ގުރޫޕުން ހުށައެޅި މައްސަލަ ފާސް ކުރަން ވޯޓް ދޭން ނިންމާ އެެ ޕާޓީން ނެރިފައިވާ ތްރީލައިން ވިޕާއި ގުޅޭގޮތުން މައުލޫމާތު ހިއްސާ ކުރަމުން އެމްޑީޕީގެ ޕީޖީ ލީޑަރު މުހައްމަދު އަސްލަމް ވިދާޅުވީ ރައީސް ނަޝީދުގެ އިތުބާރު ނެތި ގަދަބާރުން ރިޔާސަތު ގައި އިންނެވުމަށް ކުރައްވާ މަސައްކަތަށް ފުރުސަތު ނުދެއްވާނެ ކަަމަށެވެ.

ރައްޔިތުންގެ މަޖިލީހުގެ ރައީސް ނަޝީދުގެ އިތުބާރު ނެތް ކަމަށް 48 މެންބަރުންގެ ސޮޔާއެކު ދެވަނަ ފަހަރަށް ހުށަހަޅައިފައިވާއިރު، މައްސަލަ ބަލަައިގަނެ ރައީސް ނަޝީދަށް ފޮނުވި ނޯޓިސްގެ މުއްދަތު މާދަމާ އަށް ހަމަވާނެއެވެ. މަޖިލީހުގެ ގަވާއިދު ބުނާ ގޮތުން 14 ދުވަހުގެ ނޯޓިސް ހަމަވެ އެންމެ އަވަހަށް އަންނަ ރަސްމީ ދުވަހެއް ގައި އެ މައްސަލަ ކުރިއަށް ގެންދަން ޖެހެއެވެ.

މިއަދު ނޫސްވެރިންނާއި ބައްދަލު ކުރައްވައިފި ވާހަކަ ދައްކަވަމުން އަސްލަމް ވިދާޅުވީ، ދެން އެންމެ އަވަހަށް މަޖިލީހުގައި ކުރިއަށް ގެންދަން ޖެހޭނީ ރައީސް ނަޝީދުގެ އިތުބާރު ނެތް މައްސަލަ ކަމަށާއި އަދި އެ ޖަލްސާ ނުބާއްވާ ނަމަ އެހެން އެއްވެސް މަސައްކަތެއް ކުރުމަށް އެއްބާރުލުން ނުދޭން ނިންމާފައިވާ ކަމަށެވެ. އެގޮތުން އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުވާ ކުރެއްވުމަށް ބާއްވާ ޖަލްސާއަށް ވެސް އެއްބާރުލުން ދެވެން ނޯންނާނެ ކަމުގައި އަސްލަމް ވަނީ ވިދާޅުވެފައެވެ. 

މަޖިލީސް ހިންގަން ޖެހޭނީ ގަވާއިދާއި އެއްގޮތަށް ކަމަށާ އެ ނޫން ގޮތަކަށް މަޖިލީސް ކުރިއަށް ގެންދަން އެއްވެސް ބަޔަކަށް ފުރުސަތު ދީގެން މަޖިލީހުގެ މެޖޯރިޓީން ފުރުސަތު ދީގެން ނުވާނެކަމުގައި އަސްލަމް ވަނީ ވިދާޅުވެފައެވެ. 

މީގެ އިތުރުން މަޖިލީހުގެ ނާއިބު ރައީސް އީވާ އަބްދުالله، އާދިއްތަ ދުވަހުގެ ޖަލްސާއަށް ވަޑައިނުގެން އެ ދުވަހު ޖަލްސާ ކުރިއަށް ގެންދަން ފުުރުސަތު ނުދޭން ރާވާފައިވާ ކަމަށް އެމްޑީޕީން ތުހުމަތު ކުރާއިރު ނަޝީދުގެ އިތުބާރުގެ މައްސަލަ އިތުރަށް ފަސްކޮށް އާންމު ޖަލްސާތައް ހޯމަ ދުވަހު ފަށަން މަޖިލީހުގެ އިދާރާ އިން މަސައްކަތް ކޮށްފާނެ ކަމަށްވެސް އެ ޕާޓީން ވަނީ ތުހުމަތު ކޮށްފައެވެ. 

މީގެ އިތުރުން އަސްލަމް ވިދާޅުވީ އެގޮތަށް އެކަން ކުރުމުގެ ފުރުސަތު ނުދޭނެ ކަމަށެވެ. އަދި ނަޝީދު ބޭނުންފުޅުވާ ގޮތަށް މަޖިލީހުގެ ގަވާއިދު މަނާކޮށް އެ މައްސަލަ ފަސް ކުރުމުގެ ފުރުސަތު ނުދެވޭނެ ކަމަށެވެ.

އަދި ރައީސް ނަޝީދުގެ އިތުބާރުގެ މައްސަލަ ކުރިއަށް ނުގެންގޮސް އިންތިހާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ހުވާ ކުރެއްވުމުގެ ދަރުބާރު ކުރިއަށް ގެންގޮސްފިނަމަ ރައީސް މުއިއްޒަކީ ގާނޫނާއި އެއްގޮތްވާ ގޮތުގެ މަތީން ހުވާ ކުރައްވައިގެން ހުންނެވި ރައީސެއް ކަމުގައި އެމްޑީޕީގެ ޕާލިމަންޓަރީ ގުރޫޕުން ނުބާލާނެ ކަމުގައިވެސް އަސްލަމް މިއަދު ވިދާޅުވިއެވެ. 

އަސްލަމްގެ ވާހަކަތަކަށް ތާއީދު ކުރައްވައި ކިނބިދޫ ދާއިރާގެ މެންބަރު މުހައްމަދު ނާޝިޒުވެސް ވަނީ، އިތުބާރުގެ މައްސަލަ ނުނިންމާ ނޮވެންބަރު 17 ވަނަ ދުވަހު އިންތިހާބީ ރައީސުލްޖުމްހޫރިއްޔާ ހުވާ ކުރެއްވުމުގެ ޖަލްސާގެ ރިޔާސަތުގައި ނަޝީދަށް ނުއިންނެވޭނެ ކަމަށެވެ. އަދި އެގޮތުގައި އެ ޖަލްސާ ކުރިއަށް ގެންގޮސްފިނަމަ ރައީސް މުއިއްޒުގެ ކެބިނެޓަށް ރުހުން ނުދޭނެ ކަަމަށްވެސް އޭނާ ވިދާޅުވި އެވެ. 

"އެ ޖަލްސާ އެހެން ކުރިއަށް ގެންދަވައިފި ކަމުގައިވާނަމަ އެ ރައީސުލްޖުމްހޫރިއްޔާ ފޮނުވާ ކެބިނެޓާއި އެހެން ކަންކަމަށް އަޅުގަނޑުމެންނަށް ކަނޑައެޅިގެން ނޯ ޖަހާނީ އިނގޭތޯ. މިއީ ވަކި ޕްރޮސެސް އެއް އޮންނަ ކަމެއް،" ނާޝިޒު ވިދާޅުވި އެވެ.