އަލްޖަޒީރާގެ އިސް ނޫސްވެރިއެއް ކަމަށްވާ ވަޢީލް ދާއޫދްގެ ޢާއިލާ މެމްބަރުން ތަކެއް ޝަހީދުކޮށްލައިފިިއެވެ.

ފަލަސްޠީންގެ ނުސައިރަތް ރެފިޔުޖީ ކޭމްޕަށް އިޒްރާއިލުން ދިން ހަމަލާއެއް ވާއިލްގެ އާއިލާ ތިބި ގެއަށް ވަނީ އަމާޒުވެފައެެވެ. މިހަމަލާގެ ސަބަބުން ނޫސްވެރިޔާ ވާއިލްގެ އަނބިމީހާއާއި އަންހެންދަރިފުޅާއި ފިރިހެން ދަރިފުޅު އަދި ވާއިލްގެ ކާފަދަރިފުޅުވެސް ވަނީ ޝަހީދުވެފައެވެ.

އަލްޖަޒީރާއިން ވަނި ވާއިލްގެ ޢާއިލާ ޝަހީދު ކޮށްލުމުން އެކަން ކުށްވެރިކޮށްފައެވެ.

އަލްޖަޒީރާގެ ޢަރަބި ބަހުން ރިޕޯޓް ކުރާ ރިޕޯޓަރު ޠަމީރް އަލްމިއްޝަލް ވިދާޅުވީ ވާއިލްގެ ޢާއިލާ ޝަހީދުކޮށްލުމަކީ، އިޒްރާއިލުން ފަލަސްޠީންގެ ނޫސްވެރިންނަށް އަމާޒުކޮށްގެން ދޭ ހަމަލާ ހަމަލާތަކުގެ ތެރެއިން ހަމަލާއެއް ކަމަށެވެ. ވާއިލް އަކީ ޣައްޒާގެ އަލްޖަޒީރާ ޢަރަބިކް ބިއުރޯގެ އެންމެ އިސް ނޫސްވެރިޔާއެވެ.

ޠަމީރް، ވާއިލް ސިފަ ކުރައްވާފައިވަނީ ޣައްޒާގެ އަޑުގެ ގޮތުގައެވެ.

“ވާއިލް އަކީ ނޫސްވެރިކަމުގެ ވަރުގަދަ ތަނބެއް، އޭނާ ވަނީ އިޒްރާއިލުން ނޫސްވެރިންނަށް އަމާޒުކޮށް ދީފައިވާ ހަމަލާތަކާއި އަންހެނުންނާއި ކުޑަކުދިންނަށް އަމާޒުކޮށްދޭ ހަމަލާތަކުގެ ވާހަކަތައް ވަރަށް ބޮޑަށް ގެނެސްދީފައި، ވާއިލް ވަނީ އިޒްރާއިލުން އޭނާއަށާއި އޭނާގެ އާއިލާއަށް ހުއްޓުމެއް ނެތި ދެމުންދިޔަ އިންޒާރުތަކަށް ނުބަލައި، އިޒްރާއިލްގެ ހައްދުފަހަނަ އެޅި ޔަހޫދީންގެ ހަމަލާތައް ރިޕޯޓްކޮށްފައި، ޣައްޒާގައި ވަމުންދާ ކަންކަން ދުނިޔެއަށް ކިޔައިދިނުމަށް ޓަކައި ޣައްޒާ ދޫކޮށް ދިއުމަށް ވާއިލް ވަނީ ދެކޮޅު ހަދައިފައި” ޠަމީރް އަލްޖަޒީރާއަށް ބުނެފައިވެއެވެ.

ޠަމީރް ބުނެފައިވަނީ އަދިވެސް ވާއިލްގެ އަޑު ދުނިޔެއަށް ފޯރު ކޮށްދޭނެ ކަމަށާއި، ޣައްޒާގައި ތިބި ރިޕޯޓަރުންގެ އަޑު ހުއްޓުމެއް ނެތި ދުނިޔެއަށް ފޯރުކޮށްދޭނެ ކަމަށެވެ.

ވާއިލް ގެ ޢާއިލާ ކުރިން ދިރިއުޅެމުންދިޔައީ ޣައްޒާގައެވެ. ޣައްޒާއަށް ދެމުން ދިޔަ ހަމަލާތަކާއި އެކު ޢާއިލާގެ އެހެން މެމްބަރުންނާއި އެކު ތިބުމަށްޓަކައި ވާއިލްގެ ޢާއިލާއިން ވަނީ ނުސައިރަތް ކޭމްޕަށް ދިރިއުޅުން ބަދަލު ކޮށްފައެވެ.

ރޭގެ ހަމަލާގައި ވާއިލްގެ އަނބިމީހާ އާއި ސީނިއަރ ހައި ސްކޫލްގައި ކިޔަވަމުން ދިޔަ އޭނާގެ ފިރިހެން ދަރިފުޅަކާއި، 7 އަހަރުގެ އަންހެން ދަރިފުޅަކާއި އޭނާގެ ކާފަ ދަރިފުޅު އާދަމް ވެސް ވަނީ ޝަހީދުވެފައެވެ. އަދި އޭނާގެ ޢާއިލާގެ އެހެން މެމްބަރުންވަނީ ވީނުވީއެއް ނޭނގިފައެވެ.