މޯލްޑިވިއަން ޑިމޮކްރެޓިކް ޕާޓީ (އެމްޑީޕީން) އެ ޕާޓީގެ ރައީސްގެ މަގާމުގައި ހުންނެވުމަށްފަހު ޕާޓީން ވަކިވެވަޑައިގެން މަޖިލީހުގެ ރައީސް މުހައްމަދު ނަޝީދަށް އެއްވެސް އިރަކު އިތުބާރު ނުކުރައްވާކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު ވިދާޅުވެއްޖެ އެވެ.
އެމްޑީޕީގެ 46 މެމްބަރުންގެ ސޮޔާއެކު މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފައިވާއިރު، އެ މައްސަލައާއި ގުޅިގެން ނަޝީދު ޖަވާބުދާރީވުމަށް އާދިއްތަ ދުވަހަށް ވަނީ އެޖެންޑާ ވެސް ކުރެވިފައެވެ.
އެކަން އެހެން އޮތްއިރު އެމްޑީޕީން ވަނީ ނަޝީދު ރިޔާސަތުގައި ހުންނަވަނިކޮށް އިންތިޚާބީ ރައީސުލްޖުމްހޫރިއްޔާ ޑރ މުހައްމަދު މުއިއްޒު ހުވާ ކުރެއްވި ނަމަވެސް، އެ ހުވާ ގަބޫލު ނުކުރާނެ ކަމަށާއި، އަދި އެމަނިކުފާނުގެ ކެބިނެޓަށް މަޖިލީހުން ރުހުން ވެސް ނުދޭނެކަމަށް ބުނެފައެވެ.
މަޖިލީހުގެ ރައީސް ނަޝީދަށް ގިނަ މެމްބަރުން އިތުބާރު ނުކުރައްވާ ކަމަށާއި، އިތުބާރު ނެތް ބޭފުޅެއްގެ ރިޔާސަތު އިންތިޚާބީ ރައީސް ހުވާކުރައްވައިގެން ނުވާނެކަމަށް އެމްޑީޕީގެ އިސްބޭފުޅުން ގެންދަވަނީ ވިދާޅުވަމުން ނެވެ.
ނަޝީދުގެ އިތުބާރު ނެތް މައްސަލައާއި ގުޅޭގޮތުންވާހަކަދއްކަވަމުން ރައީސް ޥާލިހު ވިދާޅުވީ ރައްޔިތުންގެ މަޖިލީހުގެ ރައީސްކަން ނަޝީދަށް ދޭން ނިންމީ ޕާލަމެންޓްރީ ގުރޫޕުގެ އިތުބާރު އެމަނިކުފާނުގެ މައްޗަށް އޮވެގެން ނޫން ކަމަށެވެ.
އެކަން ކުރެއްވީ އޭރުގެ ހާލަތަށް ވިސްނަވާ މަސްލަހަތު ނެގެހެއްޓުމަށް ކަމަށާއި، އެއްވެސް އިރަކު އެމްޑީޕީގެ މެމްބަރުން ނަޝީދަށް އިތުބާރު ނުކުރައްވާކަމަށް ރައީސް ޞާލިހު ވިދާޅުވި އެވެ.
"އަޅުގަނޑުމެން އޭރު ބޭނުންނުވީ ރިޔާސީ އިންތިޚާބުގެ ތެރޭގައި ބޮޑު ހަލަބޮލިކަމެއްގެ ތެރެއަށް ދާން. އެގޮތަށް ބޭނުންނުވާތީ ވަގުތީގޮތުން ކުރި ކަމެއް. އޭރުވެސް އިތުބާރު އޮވެގެނެއް ނޫން. ކަންތައްތައް ކުރަމުން ގެންދެވި ގޮތް އޭރުގެ މަޖިލިސް މެމްބަރުންނަކަށް ކަމަކު ނުދޭ. މިކަން ކުރިއަށް ގެންދާގޮތަށް އޭރުވެސް ނިންމާފައި އޮތީ"
ރައީސް ޞާލިހު
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެންމެ ފުރަތަމަ މަޖިލީހަށް ވެއްދީ އެމްޑީޕީގެ ދެ ރައީސުންގެ ދެމެދުގައި އޮފެދުނު ވާދަވެރިކަން ބޮޑުވެ، އުފެދުނު ނުތަވަސްކަމުގައި ނަޝީދު ޕާޓީ ދޫކުރައްވާފައި ވަޑައިގެން އޭނާގެ މޭސްތިރިކަމުގައި އުފެއްދި ދަ ޑިމޮކްރެޓްސް ޕާޓީއާއި ގުޅިވަޑައިގަތުމުން ނެވެ.
އޭރު އެ މައްސަލަ ކުރިއަށް ނުގެންދެވުނީ މަޖިލީހުގެ ރައީސާއި ނައިބު ރައީސްގެ އިތުބާރު ނެތްކަމުގެ މައްސަލަ އެއްކޮށް މަޖިލީހަށް ހުށައަޅާފައި އޮތުމުންނެވެ.
އެ ފަހުން އެ ދެ މައްސަލަ ވެސް އަނބުރާ ގެންދިއުމަށް ފަހު ރިޔާސީ އިންތިޚާބު ނިމުމުން އަނެއްކާވެސް ވަނީ ނަޝީދުގެ އިތުބާރު ނެތްކަމުގެ މައްސަލަ މަޖިލީހަށް ވައްދާފަ އެވެ.
Advertisement
This content is created and paid for by advertisers and does not involve Voice Journalists
