އިޒްރާއިލުން މެދުކެނޑުމެއް ނެތި ފަލަސްޠީނުގެ ޣައްޒާއަށް ބޮމާއި ރޮކެޓުގެ ހަމަލާތައް ދެމުންދާއިރު ފަލަސްޠީނުގެ ހުޅަނގު އައްސޭރީގައި މިލިޓަރީ ރެއިޑް ޖައްސައި މީހުން ހައްޔަރު ކުރަމުން އެބަދެއެވެ.

ޣައްޒާގެ އެކި ހިސާބުތަކަށް ވައިގެ މަގުން ދެމުންދާ ހަމަލާތަކުގައި ގިނަ ބަޔަކު ޝަހީދުވެ ގިނަ ބަޔަކު ޒަޚަމްވަމުން ދާއިރު އިޒްރާއިލްގެ ޔަހޫދީން ދަނީ ހުޅަނގު އައްސޭރީގެ އެކި ހިސާބުތަކުގައި މިލިޓަރީ ރެއިޑް ޖައްސަމުން ކަމަށް އަލްޖަޒީރާގައި ބުނެފައިވެއެވެ.

އެގޮތުން ފަލަސްޠީނުގެ ކަމާއިބެހޭ އިދާރާތަކާއި ހަވާލާދީ އަލްޖަޒީރާގައި ބުނެފައިވަނީ 1200 އެއްހާ މީހުން ހައްޔަރުކޮށް އިޒްރާއިލްގެ ސިފައިންގެ ބެލުމުގެ ދަށަށް ގެންގޮސްފައިވާ ކަމަށެވެ.

ހުޅަނގުނ އައްސޭރިން މީހުން ހައްޔަރުކުރަމުންގޮސް ރޭގައި ވަނީ ފަލަސްޠީނުގެ މިނިވަންކަމަށްޓަކައި ހަނގުރާމަކޮށް ޝަހީދުވެފައިވާ ޢުމަރް ބަރްޣޫތީގެ އަނބިމީހާ އުއްމު އާސިފް ބަރްޣޫތިީ ހައްޔަރު ކޮށްފައެވެ. އޭނާއަކީ ޢުމުރުން ދުވަސްވެފައިވާ އަންހެނެކެވެ.

ހުޅަނގު އައްސޭރީގައި ރޭ ހިންގި މިލިޓަރީ ރެއިޑް ތަކުގައި ފަލަސްޠީނުގެ މިނިވަންކަމަށްޓަަކައި ހަނގުރާމަ ކުރަމުންދާ ޖަމާލް އަލް ޠަވީލްގެ ގެއަށް ވަދެ ބަލައި ފާސްކުރުމުގެ ނަމުގައި އެގެއަށް ގެއްލުންދީ ހަދައިފައިވެއެވެ.

ހުޅަނގު އައްސޭރީގައި ހިންގަމުންދާ މިލިޓަރީ ރެއިޑް ތަކުގައިވެސް ގިނަ ބަޔަކު ވަނީ ޝަހީދުވެފައެވެ.