އިންތިޤާލީ އިންސާފުގެ އޮފީހުން ތަހުގީގުކޮށް ނިންމާފައިވާ މައްސަލަތަކުގެ ތެރެއިން ގިނަ އަދަދެއްގެ މައްސަލަތަކުގައި ނިންމާފައިވާ ނިންމުންތައް ބަދަލުކުރުމުގެ މަސައްކަތް ފަށައިފިއެވެ.

"ވޮއިސް" އަށް މައުލޫމާތު ލިބިފައިވާ ގޮތުގައި އިންތިގާލީ އިންސާފުގެ އޮފީހަށް މިހާތަނަށް ހުށަހެޅިވާ 452 މައްސަލަ ތަކުގެ ތެރެއިން ތަހުގީގުކޮށް ނުނިމި 279 މައްސަލަ އެބައޮތެވެ.

އަދި ތަހުގީގު ނިންމާފައިވާ 173 މައްސަލައެއް އޮތް އިރު، އޭގެ ތެރެއިން 72 މައްސަލަ އަކީ ރިޕޯޓް ފާސްކުރުމަށްފަހު ހުއްޓިފައިވާ މައްސަލަތަކެވެ. 

"ވޮއިސް" އަށް ލިބިފައިވާ މައުލޫމާތު ތަކުން އެނގޭ ގޮތުން، އެ އޮފީހުން މިހާރު މަސައްކަތް ކުރަމުންދަނީ، މިހާތަނަށް ގޮތެއް ނިންމައި، ރިޕޯޓު ފާސްކުރި މައްސަލަތަކުގެ ތެރެއިން 56 މައްސަލައެއްގެ ނިންމުން ބަދަލުކުރުމަށެވެ. 

މީގެ އެތައް މަސް ކުރިން، އޮމްބަޑްސްޕާސަނުންގެ ބައްދަލުވުމުން ގޮތެއް ނިންމާފައިވާ، އެތަކެއް ރައްޔިތުންގެ ހައްގުތަކާއި ގުޅޭ މައްސަލަތައް މީޑިއޭޝަނުގެ މަރުހަލާއަށް ނުފޮނުވައި، އެ މައްސަލަތައް ހިފަހަށްޓާފައިވާއިރު، އެ މައްސަލަ ތަކުގެ ނިންމުން ބަދަލު ކުރުމަށް އެ މައްސަލަތައް ބައްދަލު ވުންތަކަށް އެޖެންޑާ ކުރަމުންދާ ކަމަށް "ވޮއިސް" އަށް މައުލޫމާތު ލިބިފައިވެއެވެ. 

އެގޮތުން އޮމްބަޑްސްޕާސަންގެ ބައްދަލުވުމަށް އެ ހުށަހަޅާ މައްސަލަތަކާ ގުޅިގެން އޮމްބަޑްސްޕާސަނުން ދޭ ރައުޔައް ފަހުން ބަދަލުކުރުމާއެކު، ބައްދަލުވުމުގައި ކަން ހިނހި ގޮތާ މުޅިން ޚިލާފަށް ޔައުމިއްޔާތައް ލިޔެ، ނިންމުމުގެ ރިޕޯޓުތައް ބަދަލުކުރަމުންދާކަމަށް ވަނީ އެނގިފައެވެ. 

މީގެ އިތުރުން ބައްދަލުވުންތަކުގައި ބައިވެރިވެވަޑައިނުގަންނަވާ އޮމްބަޑްސްޕާސަނެއް އެ ބައްދަލުވުންތަކަށް ހާޒިރުވެވަޑައިގެން ގޮތް ނިންމުމުގައި ބައިވެރިވެވަޑައިގެންނެވިކަމަށް ފެންނާނެ ގޮތަށް ރިޕޯޓުތަކަށް ބަދަލުގެނައުމުގެ މަސައްކަތްކޮށް ބެކްޑޭޓެޑުކޮށް ރިޕޯޓުތަކުގައި އޭނާ ލައްވައި ސޮއިކުރުވަމުންދާކަމަށާ އެ އޮފީހަށް ހުށަހެޅިފައިވާ ވަކި ބަޔަކާ ގުޅުން ހުންނަ މައްސަލަތަކަކީ އިސްކަންދޭ މުހިއްމު މައްސަލަތައް ގޮތުގައި ކަނޑައަޅައި އެ މައްސަލަތަކުގައި ވަކި ގޮތަކަށް ނިންމުމަށް ތަހުގީގުކުރާ އިންވެސްޓިގޭޓަރުންނަށް ފިއްތުންތައް ކުރިމަތިވަމުން އަންނަކަމަށް އޮމްބަޑްސްޕާސަން އޮފީހުގެ ފަރާތެއް ވޮއިސް އަށް މައުލޫމާތު ދީފައިވެއެވެ. 

އިންތިގާލީ އިންސާފުގެ އޮފީހަކީ ވޭތުވެދިޔަ 65 އަހަރު އިންސާނީ ހައްގުތަކާއި އަސާސީ މިނިވަންކަމަށް އަރައިގަނެ ދައުލަތާއި މުވައްސަސާ ތަކުން ހިންގާފައިވާ މައްސަލަތަކަށް އިންސާފު ހޯދައިދިނުމުގެ ވައުދާ އެކު ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު، ޑިސެމްބަރު 17, 2020 ގައި އުފެއްދެވި އޮފީހެކެވެ.