ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޤާމުން ވަކިކުރުމަށް ބާއްވާ ޖަލްސާ އާދިއްތަ ދުވަހު ބާއްވާނެކަން މެމްބަރުންނަށް އަންގައިފި އެވެ. 

ރައީސް ނަޝީދު މަޖިލީހުގެ ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު ހުށައަޅާފައިވަނީ އޮކްޓޫބަރު 8 ގައެވެ. އަދި އެފަހުން ނަޝީދަށް ވަނީ 14 ދުވަހުގެ ނޯޓިސް ވެސް ފޮނުވާފަ އެވެ. 

މަޖިލީހުގެ ގަވައިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާ ނޯޓިސް ފޮނުވާތާ 14 ދުވަސް ހަމަވާ ތާރީހުގެ ފަހުން ދެން އެންމެ އަވަހަށް އޮންނަ ސަރުކާރު ބަންދު ނޫން ދުވަހެއްގައި އެ މައްސަލަ އެގެންޑާ ކުރަން ޖެހޭނެ އެވެ. 

Advertisement

އެގޮތުން އެ މައްސަލަ އާދިއްތަ ދުވަހަށް މަޖިލީހުގެ އިދާރާއިން އެޖެންޑާކޮށްފައިވާއިރު ޖަލްސާ އޮންނާނެކަމަށް އިދާރާއިން ވަނީ މެމްބަރުންނަށް އަންގާފަ އެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލައިގެ ބަހުސް 2 ގަޑިއިރަށް ކުރިއަށް ގެންދިއުމަށް މަޖިލީހުންގެ އާންމު ކޮމެޓީން ފާސްކޮށްފައިވާއިރު، ބަހުސް ނިންމުން އަދި މެދުތެރެއިން 10 މިނެޓުގެ 3 ފުރުސަތު ރައީސް ނަޝީދަށް ދެއްވުމަށް ކޮމެޓީން ވަނީ ނިންމާފަ އެވެ. 

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އާދިއްތަ ދުވަހަށް ތާވަލުކޮށްފައިވާއިރު، އެމްޑީޕީގެ ޕީޖީން ވަނީ ނަޝީދުގެ ރިޔާސަތުގައި އިންތިޚާބީ ރައީސް ޑރ މުހައްމަދު މުއިއްޒު ހުވާކުރުން ބަލައިނުގަންނާނެ ކަމަށް ވިދާޅުވެފަ އެވެ. އަދި ހުވާ ކުރި ނަމަވެސް އެމަނިކުފާނުގެ ކެބިނެޓަށް ރުހުން މަޖިލީހުގެ ރުހުން ނުދޭނެކަމަށް ބުނެ އިންޒާރުދީފަ އެވެ.