މީހަކު ރަހީނުކޮށް އަނިޔާކުރިކަމުގެ ތުހުމަތު ކުރެވޭ މީހާ ހައްޔަރުކޮށް 15 ދުވަހުގެ ބަންދު މުއްދަތު ޖަހައިފި އެވެ. 

އެ މައްސަލައިގައި ހައްޔަރުކޮށްފައި ވަނީ ބަންގްލަދޭޝްގެ ރައްޔިތެއްކަމަށް ވާ އުމުރުން 37 އަހަރުގެ މުހައްމަދު އާރިފް ހޮސައިން އެވެ. 

އެމީހާ ހައްޔަރުކޮށް ކްރިމިނަލް ކޯޓަށް ހާޒިރުކުރުމުން ކޯޓުން ވަނީ އޭނާގެ ބަންދަށް 15 ދުވަސް ދީފައެވެ. 

އޭނާ ބަންދުކުރުމަށް ކޯޓުން ކުރި އަމުރުގައި ބުނެފައި ވަނީ އޭނާ އަކީ ސައްހަ ލިޔެކިޔުންތައް ނެތި ގަވައިދާއި ޚިލާފަށް ރާއްޖޭގައި އުޅޭ މީހަކަށް ވާތީ އާއި، އަދި އޭނާ ދޫކޮށްލާފައި ހުރި ކަމަށް ވާނަމަ ރާއްޖެއިން ފިލައިގެން ދިއުމުގެ އިހުތިމާލު އޮތް ކަމަށެވެ. 

އެހެން ކަމުން އޭނާއަށް ތުހުމަތުކުރެވޭ މައްސަލައާއި ގުޅިގެން ބަންދުގައި ބެހެއްޓުމަށް 15 ދުވަސް ދީފައިވާކަމަށް ކްރިމިނަލް ކޯޓުން ވަނީ ބުނެފައެވެ. 

މީހަކު ރަހީނުކޮށް އަނިޔާކުރުމުގެ ތުހުމަތުގައި ބަންގްލަދޭޝްގެ ރައްޔިތެއް ހައްޔަރުކޮށްފައިވާއިރު، އެމީހާ އާއި އިތުރު ބަޔަކު ގުޅިގެން ރަހީނުކުރި މީހާއަށް އަނިޔާކުރާ މަންޒަރު ފެނިގެންދާ ވީޑިއޯއެއް ހެކީގެ ގޮތުގައި ފުލުހުން ވަނީ ކްރިމިނަލް ކޯޓަށް ހުށައަޅާފަ އެވެ.