ޔަހޫދީ އިޒްރާއިލުން ހުއްޓުމެއްނެތި ދެމުންދާ ހަމަލާތަކުގައި އަނިޔާ ލިބެމުންފާ ފަލަސްތީނުގެ ރައްޔިތުން ބަލިކަށިވަމުންދާކަމަށް ފެނުނަސް، އެމީހުން އަދި ތެދުވެ ޔަހޫދީންގެ މައްޗަށް ކުރި ހޯދާނެކަމަށް ފާރިސް މައުމޫނު ވިދާޅުވެއްޖެ އެވެ. 

ފާރިޝް މިފަދައިން ވިދާޅުވެފައި ވަނީ ފަލަސްތީނު މިނިވަންކުރުމަށްޓަކައި ހަނގުރާމަ ކުރަމުން އަންނަ ހަމާސް ޖަމާއަތުގެ މަސައްކަތްތަކަށާއި،އިޒްރާއިލް ފަލަސްތީނަށް ދެމުންދާ ހަމަލާތަކާއި ގުޅިގެން އެ ރައްޔިތުންނަށް ލިބެމުންދާ ޖިސްމާނީ އަދި ނަފްސާނީ ގެއްލުންތަކަށް އިޝާރާތްކުރައްވާ އެކްސް ކޮމްގައި ލިޔުއްވި ޕޯސްޓެއްގައެވެ.

ފާރިޝް ވިދާޅުވީ އިޒްރާއިލުން ހުއްޓުމެއްނެތި ފަލަސްތީނުގެ ރައްޔިތުންނަށް ދެމުންދާ ހަމަލާތަކުގެ ސަބަބުން، ފަލަސްތީނުގެ ޖީލުތަކަށް ނަފްސާނީގޮތުން ކުރާނެ އަސަރުތައް ޒަޔަނިސްޓުންނަށް ނުވަލަ އިޒްރާއިލްގެ ހަރުކަށި ޖަހޫދީ ޖަމާއަތްތަކަށް ތާއީދުކުރާ ފަރާތްތަކަށް އެނގެން ޖެހޭ ކަމަށެވެ. 

މުއާސަލާތީ ގޮތުން ދުނިޔެ ގުޅި ލާމެހިފައިވާއިރު، އަދި ޓެކްނޮލޮޖީގެ ގޮތުން ކުރިއަރާފައިވާ މި ޒަމާނުގައި ފަލަސްތީނުގެ ރައްޔިތުންނަށް އިޒްރާއިލުން ދެމުންދާ ހަމަލާތަކުގެ މަންޒަރުތައް ދުނިޔޭގެ ކޮންމެ ބިތެއްގައި ހުންނަ ކޮންމެ މީހަކަށް ވެސް ފެނިގެންދާނެ ކަމަށާއި، އެ މަންޒަރުތަކަކީ ހަނގުރާމައިގެ ތަޖުރިބާ ކުރެވޭ މީހުންގެ އިތުރުން، އެ މަންޒަރުތައް ފެންނަ ކޮންމެ މީހަކަށް ވެސް އަސަރުކުރާނެ މަންޒަރުތަކެއް ކަމަށް ފާރިޝް ވިދާޅުވި އެވެ. 

ފާރިޝް ވިދާޅުވީ ފަލަސްތީނުގެ ރައްޔިތުންނަށް ލިބެމުންދާ އަނިޔާތަކުގެ އަސަރު ޖީލުތަކަށް ދެމިގެންދާނެ ކަމަށެވެ. މިހާރުގެ މަންޒަރުތަކަށް ބަލާއިރު، އެ ރައްޔިތުން ބަލިކަށިވަމުން އަންނަ ކަމަށް ބަޔަކަށް ހީވި ނަމަވެސް، އެ މީހުން އަދި ތެދުވެ، އެމީހުންނަށް އަނިޔާވެރިވަމުންދާ މީހުންގެ މައްޗަށް ކުރި ހޯދާނެކަމީ ޔަގީން ކަމެއް ކަމަށް ފާރިޝް ވިދާޅުވި އެވެ. 

އިޒްރާއިލުން ވަނީ ފަލަސްތީނުގެ މުއާސަލާތީ ޚިދުމަތްތައް މުޅިން ކަނޑާލާ ހުއްޓުމެއްނެތި ބޮންއަޅާ ބޮޑެތި ގެއްލުންތަކެއް ފަލަސްތީނަށް ދީފައެވެ.