އިޒްރާއިލުން ހަމަބުއްދިއަށް އެނބުރި އައިސް ޣައްޒާއަށް ދެމުންދާ ނުރައްކާތެރި ހަމަލާތައް ހުއްޓާލުމަށް ތުރިކީ ވިލާތުގެ ރައީސް ރަޖަބް ޠައްޔިބް އުރްދުޣާން ގޮވައިލައްވައިފިއެވެ.
އުރްދުޣާން ވިދާޅުވެފައިވަނީ އިޒްރާއިލް ވަނީ ހަމަ ބުއްދި ފިލައި ގޮއްސައިކަމަށެވެ. އަދި އެކަމުން އަރައިގަނެ ޣައްޒާއަށް ދެމުންދާ ނުރައްކާތެރި ހަމަލާތައް ހުއްޓާލުމަށް އުރްދުޣާން ގޮވައިލައްވައިފައިވެއެވެ.
“އިޒްރާއިލުން ރޭ ޣައްޒާއަށް ދިން ބާރުގަދަ ހަމަލާތައް އަނެއްކާވެސް އަންހެނުންނާއި ކުޑަކުދިންނާއި ކުށެއްނެތް ޢާންމުންނަށް ވަނީ އަމާޒުކޮށްފައި، އަދި އެކަމުގެ ސަބަބުން އިންސާނީ މުޞީބާތް މިވަނީ ބޮޑުވެފައި” އުރްދުޣާން ވިދާޅުވެފައިވެއެވެ.
އިޒްރާއިލުން ރޭ ވަނީ ޣައްޒާއަށް އާދަޔާ ޚިލާފު ބާރުގަދަ ނުރައްކާތެރި ހަމަލާތަކެއް ދީފައެވެ. އެހަމަލާތަކުގެ ސަބަބުން ޣައްޒާގެ މުވާސަލާތީ ގުޅުން މުޅިންހެން ވަނީ ކެނޑިފައެވެ.
އެއާއި ގުޅިގެން ހަމަލާތަކުގައި އަނިޔާވި މީހުންނަށް ފަރުވާ ހޯދުމަށް އެދި ހޮސްޕިޓަލް ތަކާއި އަވަސްފަރުވާ ދޭ ފަރާތްތަކަށް ވަނީ ގުޅޭ ގޮތް ނުވެފައެވެ.
Advertisement
This content is created and paid for by advertisers and does not involve Voice Journalists
