މަޖިލީހުގެ ރައީސްކަމުގެ މަޤާމުން މުހައްމަދު ނަޝީދު ވަކިކުރުމަށް ހުށައަޅާފައިވާ މައްސަލަ މަޖިލީހުގެ ނައިބު ރައީސާ އީވާ އަބްދުالله އާލާސްކަންފުޅާއި އުޅުއްވާތީ ކުރިއަށް ގެންދެވެން ނެތްކަމަށް އަންގައި މާދަމާއަށް ތާވަލުކޮށްފި އެވެ. 

ރައީސް ނަޝީދު މަޖިލީހުގެ ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު ހުށައަޅާފައިވަނީ އޮކްޓޫބަރު 8 ގައެވެ. އަދި އެފަހުން ނަޝީދަށް ވަނީ 14 ދުވަހުގެ ނޯޓިސް ވެސް ފޮނުވާފަ އެވެ. 

މަޖިލީހުގެ ގަވައިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ހުށައަޅާ ނޯޓިސް ފޮނުވާތާ 14 ދުވަސް ހަމަވާ ތާރީހުގެ ފަހުން ދެން އެންމެ އަވަހަށް އޮންނަ ސަރުކާރު ބަންދު ނޫން ދުވަހެއްގައި އެ މައްސަލަ އެގެންޑާ ކުރަން ޖެހޭނެ އެވެ. 

Advertisement

އެގޮތުން މިއަދަށް އެ ޖަލްސާ އެޖެންޑާ ކުރި ނަމަވެސް މަޖިލީހުގެ ނައިބު ރައީސާ އީވާ އަބްދުﷲ އާލާސްކަންފުޅާއި އުޅުއްވާތީ ޖަލްސާކުރިއަށް ގެންދެވޭގޮތް ވަނީ ނުވެފައެވެ.

މިއަދުގެ ޖަލްސާ ފެއްޓެވުމުގެ ކުރިން މަޖިލީހުގެ އަމީންއާންމު ފާތުމަތު ލިއުޝާ ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަގާމުން ވަކިކުރުމަށް ހުށައެޅި ގަރާރު މިއަދަށް ތާވަލުކުރެވިފައިވާކަން އަންގައި މަޖިލީހުގެ ހުރިހާ މެމްބަރުންނަށް ވެސް ނޯޓިސް ފޮނުވިފައިވާނެ ކަމަށެވެ. 

ނިއުޝާ ވިދާޅުވީ ގާނޫނު އަސާސީގެ 82 ވަނަ މާއްދާގެ (ކ) ގައި މަޖިލީހުގެ ރައީސް މަގާމުން ވަކިކުރުމާއި ބެހޭ ބަހުސެއް ހިނގާ މަޖިލީހުގެ ޖަލްސާއެއްގައި ބައިވެރިވުމާއި އެމީހެއްގެ ދިފާއުގައި ބަހުސްގައި ބައިވެރިވުމުގެ ހައްގު ލިބިގެންވާކަމަށް ބަޔާންކޮށްފައި ވާތީ މިއަދުގެ ޖަލްސާއަށް ވަޑައިގެންދެއްވުމަށް މަޖިލީހުގެ ރައީސްއަށް ވެސް ދަންނަވާފައިވާނެ ކަމަށެވެ. 

މަޖިލީހުގެ ރައީސް މަޤާމުން ވަކިކުރުމަށް ބާއްވާ ބަހުސެއްގެ ރިޔާސަތު މަޖިލީހުގެ ރައީސް ބަލަހައްޓައިގެން ނުވާނެކަމަށާއި، އެފަދަ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތަކީ މަޖިލީހުގެ ނައިބު ރައީސާއި މަޖިލީހުގެ ގަވައިދުން ހަވާލުކޮށްފައިވާ މަސްއޫލިއްޔަތެއްކަން ނިއުޝާ ފާހަގަކުރެއްވި އެވެ. އަދި ރިޔާސަތު ބަލަހައްޓަވާދެއްވުމަށް މަޖިލީހުގެ ނައިބު ރައީސްއަށް އަންގާފައިވާނެކަމަށް ވިދާޅުވި އެވެ. 

އެހެން ނަމަވެސް މަޖިލީހުގެ ނައިބު ރައީސް އާލާސްކަންފުޅާއި އުޅުއްވާކަން ބަޔާންކޮށް މިއަދު ބޭއްވުމަށް ހަމަޖެހިފައިވާ ޖަލްސާއަށް ސަލާން ފޮނުވާފައިވާތީ މިއަދު އެ ގަރާރަށް ބަހުސްކުރުން ކުރިއަށް ގެންދެވެން ނެތްކަމަށް މަޖިލީހުގެ އިދާރާއިން ވަނީ ހާމަކޮށްފަ އެވެ. 

މަޖިލީހުގެ ރައީސްގެ އިތުބާރު ނެތްކަމުގެ މައްސަލައިގެ ގަރާރަކީ އެ މައްސަލައިގެ ނޯޓިސް މުއްދަތު ހަމަވުމަށްފަހު އެންމެ އަވަހަށް އޮންނަ ބަންދު ނޫން ދުވަހެއްގައި ކުރިއަށް ގެންދަން ޖެހޭ މައްސަލައަކަށް ވާތީ މާދަމާގައި އޮންނަ ރައްޔިތުންގެ މަޖިލީހުގެ ޖަލްސާއަށް ވެސް އެ މައްސަލަ އެޖެންޑާކޮށް، އެ ޖަލްސާގެ ރިޔާސަތު ބަލެހެއްޓުމަށް މަޖިލީހުގެ ނައިބު ރައީސަށް އަންގަވާނެކަމަށް އަމީންއާންމު ވިދާޅުވި އެވެ.