ކުރީގެ ރައީސް އަދި އިދިކޮޅު ޕީޕީއެމް/ޕީއެންސީގެ ލީޑަރ ޔާމީން އަބްދުލްގައްޔޫމް ރަށު ބަންދަށް ބަދަލު ކުރެއްވީ އެމަނިކުފާނުގެ ބޭސްފަރުވާއަށް ލުޔެއް ދިނުމަށް ކަަމަށާ، ރަށުބަންދަކީވެސް ޤާނޫނު ނުދަންނަ އަނިޔާއެއް ކަމަށް ޕީޕީއެމްގެ ނާއިބު ރައީސް އަދި ނައިފަރު ދާއިރާގެ މެންބަރު އަހުމަދު ޝިޔާމް ވިދާޅުވެއްޖެއެވެ. 

2022 ވަނަ އަހަރުގެ ޑިސެންބަރު މަހުގައި ރައީސް ޔާމީނުގެ މައްޗަށް ކުރިމިނަލް ކޯޓުން އިއްވާފައިވާ 11 އަހަރުގެ ޖަލު ހުކުމް ތަންފީޒުކުރެއްވުމަށް މާފުށީ ޖަލުގައި ގިނަ ދުވަސްތަކެއް ހުންނެވުމަށްފަހު، އެމަނިކުފާނު ގޭ ބަންދަށް ބަދަލުކުރީ ފާއިތުވި ރިޔާސީ އިންތިޚާބުގައި ރައީސް އިބްރާހީމް މުޙައްމަދު ޞާލިޙަށް ނާކާމިޔާބުވެވަޑައިގެން ރައީސް ޔާމީނު ތާއީދުކުރެއްވި ކެންޑިޑޭޓު ޑރ.މުޙައްމަދު މުޢިއްޒު އިންތިޚާބުވެވަޑައިގަތުމާ ގުޅިގެންނެވެ.

އެއަށްފަހު, ބޭސްފަރުވާއަށް ބޭރަށް ނުކުމެވޭ ގޮތަށް މިހާރު ވަނީ ރަށު ބަންދަށް ބަދަލުކޮށްފައެވެ. މި ލުއި އެމަނިކުފާނަށް ދެއްވާފައިވަނީ މީގެ 15 ވަރަކަށް ދުވަސްކުރިން ރައީސް ޔާމީން އަމިއްލަފުޅަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހާއި ވާހަކަފުޅުދައްކަވާ ކުރެއްވި އިލްތިމާސްތަކަށް ފަހުގައިކަމަށް ވަނީ މައުލޫމާތު ލިބިފައެވެ.

Advertisement

އެކަމާއި ގުޅިގެން ޝިޔާމް ކުރެއްވި ޓްވީޓެއްގައި ވިދާޅުވީ، ރައީސް ޔަމީން ރަށު ބަންދަށް ބަދަލުކުރުމަކީ މާކުރިންވެސް ކޮށްދެވެން އޮތް ކަމެއް ކަމަށެވެ. އަދި އެމަނިކުފާނު ބަދަލު ކުރެއްވީ ރަށު ބަންދަށް ނޫން ކަމަށާ އެއީ ބޭސްފަރުވާއަށް ދެވުނު ލުޔެއް ކަމަށް ޝިޔާމް ވަނީ ވިދާޅުވެފަ އެވެ. 

"އަދި ބެއިލްވެސް މީގެ ކުރިން ކޯޓުތަކުގައި ހުރީ ޕްރެސްޓިސް ކޮށްފައި. ރައީސް ޔާމީނާ ހިސާބުން މިކަންކަން ދަންނަކަމަކަށް ނުހެދި. ރަށުބަންދެއްވެސް ނޫން އެއީ. ބޭސްފަރުވާއަށް ދިން ކުޑަ ލުޔެއް. އެހެންނޫނަސް ރަށުބަންދަކީވެސް ޤާނޫނު ނުދަންނަ އަނިޔާއެއް."

ޝިޔާމް އިތުރަށް ވިދާޅުވީ ރައީސް ޔާމީނަކީ މައުސޫމު ބޭފުޅެއް ކަމަށާ އެމަނިކުފާނުގެ ޝަރީޢަތްތައް ހުއްޓުވާފައި ބާއްވާ ބޭއްވުމަކީ ދޭ އެންމެ ބޮޑު އަނިޔާ ކަމަށެވެ. މިއާއެކު އޭނާ ވަނީ ރައީސް ޔާމީން މިނިވަންކުރަން ގޮވާލާފައެވެ.