ރައްޔިތުންގެ މަޖިލީހުގެ ނައިބު ރައީސް އަދި ގަލޮޅު އުތުރު ދާއިރާގެ މެމްބަރު އީވާ އަބްދުالله ސަލާމުގައި ހުންނެވުމުން، މަޖިލީހުގެ ރައީސް، މުހައްމަދު ނަޝީދު މަގާމުން ވަކިކުރަން ހުށަހަޅާފައިވާ ގަރާރު ކުރިއަށް ގެންދަން މިއަދަށް ތާވަލުކުރި ޖަލްސާ ވެސް މަޖިލިހުގެ އިދާރާ އިން ކެންސަލް ކޮށްފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ރިޔާސަތުން ވަކިކުރުމަށް 49 މެމްބަރުންގެ ސޮޔާއެކު މަޖިލީހަށް ހުށަހަޅައި އެމަނިކުފާނަށް 14 ދުވަހުގެ ނޯޓިސް ފޮނުވައި، ނޯޓިސްގެ މުއްދަތު ހަމަވުމާއިއެކު އިއްޔެވެސް ވަނީ އެ މައްސަލަ އެޖެންޑާ ކޮށްފައެވެ. 

ނަމަވެސް އިއްޔެވެސް އީވާ ސަލާމުގައި ހުންނެވުމުން މައްސަލަ މިއަދަށް މައްސަލަ ތާވަލްކުރީއެވެ. 

މަޖިލީހުގެ ގަވާއިދު ގައިވާގޮތުން މަޖިލީހުގެ ރައީސް މަޤާމުން ވަކިކުރުމަށް ބާއްވާ ބަހުސެއްގެ ރިޔާސަތު މަޖިލީހުގެ ރައީސް ބަލަހައްޓައިގެން ނުވާނެއެވެ. އަދި އެފަދަ ޖަލްސާއެއްގެ ރިޔާސަތު ބެލެހެއްޓުމުގެ މަސްއޫލިއްޔަތަކީ މަޖިލީހުގެ ނައިބު ރައީސާއި ހަވާލުކޮށްފައިވާ މަސްއޫލިއްޔަކެވެ. 

ނަމަވެސް އެމްޑީޕީ މެންބަރުން ވަނީ، މަޖިލީހުގެ ރައީސާއި ނައިބު ރައީސަށް ރިޔާސަތު ނުބެލެހެއްޓެވޭ ހާލަތެއްގައި މަޖިލީހުގެ ގަވައިދުގެ 44 ވަނަ މާއްދާގައި ވާގޮތަށް މަޖިލީހުގައި އެންމެ ގިނަ ދުވަހު ހިދުމަތް ކުރެއްވި ފަސް މެންބަރުންގެ ތެރެއިން މީހަކަށް ރިޔާސަތު ބެލެހެއްޓޭނެ އެވެ. އަދި ނަޝީދުގެ މައްސަލަ ޑިމޮކްރެޓްސް އިން ގަސްތުގައި ލަސްކުރަނީ ކަމަށް ބުނެ އެމްޑީޕީން ވަނީ އެ މައްސަލަ މިހާރު ސްޕްރީމް ކޯޓަށްވެސް ހުށަހަޅާފައެވެ. 

މަޖިލީހުގެ ރައީސްގެ އިތުބާރުގެ ގަރާރާ މެދު ގޮތެއް ނުނިންމައި، އިންތިހާބީ ރައީސް ޑރ. މުހައްމަދު މުއިއްޒުގެ ހުވާ ކުރެއްވުން ވެސް ކުރިއަށް ގެންދެވިދާނެ ކަމަކަށް އެމްޑީޕީގެ ގާނޫނީ ޓީމުން ނުދެކެ އެވެ.